Ұлытау облысында 218 млн теңге мемлекетке қайтарылды — Прокуратура
ЖЕЗҚАЗҒАН. KAZINFORM — Жезқазған қаласының тұрғын үй-коммуналдық шаруашылық бөлімі жоғарылатылған баға бойынша құрылыс жұмыстары қабылданғаны анықталды. Бұл туралы Ұлытау облысының прокуратурасы мәлім етті.
«Прокурорлық тексеру нәтижесінде негізсіз төленген бюджет қаражатының сомасы 218 млн теңге болды. Құқық бұзушылықтар жойылды, тұрғын үй-коммуналдық шаруашылық бөлімінің бұрынғы басшысы абайсызда ауыр зардаптарға әкеп соққан немқұрайлылық үшін Қылмыстық кодекстің 372-бабы бойынша жауапқа тартылды», — делінген хабарламада.
Бүгінгі таңда аталған сома мемлекет кірісіне өз еркімен қайтарылды.
Еске сала кетейік, активтерді қайтару бойынша жүргізіліп жатқан жұмыстар аясында тізілім субъектілерімен 12 млрд теңгеге әлеуметтік жобаларды іске асыру бойынша 4 келісімге қол қойылды.
