Ұлттар лигасы: Хорватия Франция құрамасын тізе бүктірді

АСТАНА. KAZINFORM — Футболдан UEFA Ұлттар лигасында плей-офф кезеңінің бастапқы матчтары мәресіне жетті.

А лигасында ширек финалдық алғашқы ойында Хорватия Францияны 2:0 есебімен ұтты. 
Бірінші таймда Анте Будимир мен Иван Перишич мергендік танытып, командасына жеңіс сыйлады.

Осылайша, хорватиялықтар жартылай финалға жақындай түсті.

Дания екінші таймда алаңға шыққан Расмус Хойлундтың голы арқасында Криштиану Роналду бастаған Португалиядан айласын асырды – 1:0.

Германияны қабылдаған Италия Сандро Тоналидың көмегімен бірінші болып есеп ашқанымен, екінші таймда есе жіберіп қойды – 1:2. Тим Кляйндинст таразы басын теңестірсе, Леон Горецка жеңіс голын соқты. 

Нидерланд өз алаңында Испаниямен тең түсті – 2:2. Испаниядан Нико Уильямс пен Микель Мерино, Нидерландтан Коди Гакпо мен Тейани Рейндерс көзге түсті. 

Сондай-ақ А/B лигасының плей-офф кезеңінде Украина мықты саналатын Бельгияның 3:1 есебімен меселін қайырды. 

Түркия дәл сондай есеппен Мажарстанның мысын басты. Грекия өз алаңында Шотландиядан 0:1 есебімен ұтылса, Аустрия Сербияиен тең ойнады (1:1). 

Ал B/C лигаларының плей-офф сатысында Грузия сырт алаңда Арменияны ойсырата ұтты – 3:0. 

Словакия – Словения матчында есеп ашылмаса, Косово Исландиядан басым түсті – 2:1.

Болгария өз алаңында Ирландияға жол берді – 1:2.

Қарымта кездесулер 23 наурызда өтеді. 

Еске сала кетейік, бұдан бұрын Ұлттар лигасында плей-офф кезеңі басталатынын жазған болатынбыз.