Ұлттық банк ақша-кредит саясаты туралы баяндаманы жариялады

АСТАНА. KAZINFORM – Ұлттық банк базалық мөлшерлеме траекториясына бағалау мен макроэкономикалық сценарий ұсынды. Бұл туралы банктің баспасөз қызметі мәлім етті.   

Баяндамада болжамның алғышарттары, 2027 жылға дейінгі базалық және баламалы сценарий бойынша макроэкономикалық даму серпіні ұсынылған.

— Құжатта Ақша-кредит саясаты комитетінің базалық мөлшерлеме траекториясына ортамерзімді кезеңге арналған бағалауы, төлем балансының ағымдағы шотының болжамы, ағымдағы макроэкономикалық жағдай және ақша, валюта және қаржы нарықтарындағы ахуал бойынша деректер де қамтылған, — делінген хабарламада.

Бұдан бөлек, баяндамада ҚҚС мөлшерлемесі ұлғаюының инфляцияға әсері туралы халықаралық тәжірибе, еңбек нарығы тарапынан инфляциялық қысым көрсеткіштерін бағалау, сондай-ақ халықтың жинақтау әдеттері туралы сауалнама нәтижесі секілді тақырыптарға арнайы бокстар бар.

Еске сала кетейік, бұған дейін Ұлттық банк базалық мөлшерлеме әлі де көтерілуі мүмкін екенін айтқанын жазған болатынбыз.