Ұлттық банк дезинфляциялық ақша-кредит саясатын жүргізуді жалғастырады
АСТАНА. KAZINFORM – Ұлттық банк дезинфляциялық ақша-кредит саясатын жүргізуді жалғастырады. Бұл туралы Сенатта 2023 жылғы республикалық бюджеттің орындалуы туралы Үкімет пен Жоғары аудиторлық палатаның есебін таныстыруға арналған іс-шара барысында Ұлттық банк төрағасының орынбасары Ақылжан Баймағамбетов айтты.
«2023 жылы әлемдік экономика геосаяси қарсылық жағдайында сауда мен инвестициялардың әлсіз өсуіне және инфляцияның жоғары болуына байланысты орталық банктер жүргізіп отырған қатаң монетарлық саясат аясында ұстамды түрде өсті. Көптеген елде инфляция баяулағанына қарамастан таргеттен жоғары келе жатыр. Бұл орталық банктердің жоғары пайыздық мөлшерлемелерді ұстап тұруын қажет етті. Халықаралық валюта қорының болжамы бойынша, көптеген ел инфляцияның таргетіне 2025 жылдан ерте қайта алмайды», - деді ол.
Оның атап өтуінше, сыртқы экономикалық турбуленттікке қарамастан, 2023 жылы Қазақстан соңғы 10 жылда 5,1 пайыздық ең жоғары экономикалық өсуге қол жеткізіп, инфляцияның екі еседен астам төмендеуін қамтамасыз ете алды.
«Сыртқы бағалардың тұрақтануына және Ұлттық банктің жүргізіп отырған ақша-кредит саясаты мен Үкіметтің инфляцияға қарсы шараларының арқасында инфляция 2023 жылғы ақпандағы ең жоғары 21,3 пайыздан 9,8 пайызға дейін төмендеді. Инфляциялық процестердің тұрақтануы Ұлттық банкке 2023 жылы базалық мөлшерлемені 16,75 пайыздан 15,75 пайызға дейін 100 базистік тармаққа және осы жылы 14,75 пайызға дейін 100 базистік тармаққа біртіндеп төмендетуге арналған кеңістікті іске асыруға мүмкіндік берді. Алайда, инфляция төмендегеніне қарамастан, әлі де мақсатты деңгейден жоғары болып тұр. Инфляциялық тәуекелдер сақталуда. Ішкі сұраныс, инфляциялық күтулер, реттелетін бағалардың өсуі, алапат су тасқынының салдары ерекше назар аударуды қажет етеді. Инфляция бойынша 5 пайыздық мақсатқа жету үшін Ұлттық банк дезинфляциялық ақша-кредит саясатын жүргізуді жалғастырады», - деді Ақылжан Баймағамбетов.
