Ұлттық диалогты ұйымдастыру үшін уақыт қажет — Сирия Сыртқы істер министрі

АСТАНА.KAZINFORM — Бұл мәлімдемені сейсенбі күні Сирия Сыртқы істер министрі Асад аш-Шайбани жасады, деп хабарлайды Kazinform агенттігінің меншікті тілшісі. 

Оның айтуынша, Сирия ұлттық диалог жөніндегі конференцияны ұйымдастыруға асықпайды.

Конференцияның мақсаты — елдің бұрынғы президенті Башар Асад кеткеннен кейінгі елдің жаңа бағытын айқындау үшін әртүрлі саладағы сириялықтарды біріктіру.

— Біз Сирия қоғамы мен билігінің барлық секторларының жан-жақты өкілдігін қамтамасыз ете алатын дайындық комитетін құру мүмкіндігін алу үшін ұлттық диалог конференциясын өткізуге асықпаймыз, — деді аш-Шайбани.

Бұл мәлімдеме Сирия делегациясының Иордания билігімен келіссөздерге қатысу үшін Амманға сапары барысында айтылды.

Рейтер агенттігі бұған дейін жаңа үкімет конференцияның өтетін күнін әлі шешпегенін, ал жақында оппозициялық топтардың бірнеше мүшесі шақырту алмағанын хабарлады.

Түркия президенті Режеп Тайып Ердоған сейсенбі күні Сирия елі есін жиып, Асадты құлатқаннан кейін қалпына келу үшін уақыт керек деді. Ол 13 жылға созылған азамат соғысында инфрақұрылымға келтірілген залал күткеннен де ауыр болғанын атап өтті.

Башар Асад 8 желтоқсанда биліктен құлағаннан бері Түркия көршісін қалпына келтіру үшін қандай көмек қажет болса, көмектесетінін бірнеше рет айтып, электр қуатын жеткізу мәселесін талқылау үшін үкімет делегациясын жіберді.

Еске сала кетейік, бұған дейін АҚШ Сирияға қарсы санкцияларын жеңілдететінін жазған болатынбыз.