Ұлттық ғылым академиясы таратылады
АЛМАТЫ. KAZINFORM — Бұл шешім кеше академиктердің жалпы жиналысында қабылданды. Академия республикалық қоғамдық бірлестік ретінде жұмыс істеп келді және ҚР Президенті жанындағы тағы бір осындай ұйыммен қатар қызмет атқарды. Бұл туралы Ұлттық ғылым академиясының баспасөз қызметі хабарлады.
27 наурызда Алматы қаласында 2003 жылы қоғамдық ұйым ретінде құрылған «Қазақстан Республикасының Ұлттық ғылым академиясы» республикалық қоғамдық бірлестігінің жалпы жиналысы өтті.
— Жиын барысында бірауыздан ҰҒА РҚБ академиктерін Президент жанындағы ҚР ҰҒА (Жоғары ғылыми ұйым) құрамына трансформациялау «ҚР ҰҒА» республикалық қоғамдық бірлестігін ұйым Жарғысында көрсетілген барлық талапты сақтай отырып ерікті түрде таратуға қатысты тарихи шешім қабылданды. Жалпы жиналысқа қатысқан академиктер елдің ғылыми әлеуетін бір орталыққа шоғырландыруды көздеген азаматтық ұстанымға қолдау білдірді. Бұл шешім Президент жанындағы Ұлттық ғылым академиясының қызметіне ұқсас функциялардың қайталануын болдырмай, оны жаңа форматтағы бірегей әрі орнықты ғылыми орталық ретінде екі академия ғалымдарының ғылыми потенциялын біріктіріп нығайтуға мүмкіндік береді, — делінген хабарламада.
Еске сала кетейік, Президент жанындағы Ұлттық ғылым академиясы 2023 жылы құрылған. Сол кезден бастап ғылымды тұрақты қаржыландыру қамтамасыз етіліп, академиктерді ашық сайлау ісі жолға қойылды. Академия мемлекеттік мәртебеге ие, қазіргі таңда ол ғылымды стратегиялық тұрғыда дамытуды, басым бағыттарды ғылыми-талдамалық тұрғыда қолдауды, сондай-ақ халықаралық академиялық қауымдастықпен өзара іс-қимылды қамтамасыз етіп келеді. 2024 жылы қабылданған «Ғылым және технологиялық саясат туралы» заңға сәйкес, Академияға Жоғары ғылыми ұйым мәртебесі берілді. Алдағы уақытта ғылыми әлеуеттерін біріктірген ғылым академиясы халықаралық деңгейде ірі ғылыми жаңалықтарға қол жеткізуге мүмкіндік алды, 2026 жылы 1946 жылдан бастау алатын Қазақстанның ұлттық академиясының 80 жылдық мерейтойы болады.
Бұған дейін Ұлттық ғылым және технологиялар кеңесінің отырысында Мемлекет басшысы «ғылымы мықты елдің мемлекеті де қуатты болады. Ғылымсыз ел — құрдымға кетеді. Ал ғылымы озық ел кез келген дағдарысты еңсере алады» деп атап өткен еді.
— Салалық министрлік құрылған сәттен бастап Мемлекет басшысы ғылымның экономикаға ықпалын күшейтуді, оны инновациялармен тығыз байланыстыруды, сондай-ақ нақты іс тындыруға бағытталған ғылыми саясатты жолға қоюды тапсырған болатын. 2023 жылы Жоғары білім мен ғылымды дамытудың 2023–2029 жылдарға арналған тұжырымдамасы және «Ғылым және технологиялық саясат туралы» жаңа Заң қабылданды. Соның арқасында жас ғалымдарды қолдауға, университеттік ғылымды дамытуға, ғылыми жаңалықтарды коммерцияландыруға және өңірлердегі ғылыми инфрақұрылымды нығайтуға айрықша көңіл бөлінуде. Сондықтан қоғамдық бірлестіктің Жалпы жиналысында қабылданған бүгінгі шешім — ғылыми сабақтастықты сақтау, ғылыми қауымдастықтың ауызбірлігін арттыру, ғылым мен өндіріс арасындағы байланысты күшейту жолындағы маңызды қадам, — делінген академия хабарламасында.
Айта кетелік Ұлттық ғылым академиясының вице-президенті Асқар Жұмаділдаев еліміздегі ғылым саласын дамытуға қатысты ұсынысын айтқан еді.
