Ұлттық музейге 10 жыл: Қазақстандық суретшілердің туындылар жинағы жарық көрді
АСТАНА. KAZINFORM – Ұлттық музейде «Дала кескіндемесі: рәміздер, бояулар, бейнелер» көрмесінің аясында отандық суретшілердің туындылары топтастырылған каталогы жарық көрді.
«Биыл Ұлттық музейдің 10 жылдығына арналған бірнеше іс-шара жоспарланған. Солардың ішіндегі маңыздыларының бірі бейнелеу өнері бойынша біздің қордағы туындылар көрмесі. Бұл көрмеге Мемлекет басшысы Қасым-Жомарт Тоқаев қызығушылық танытып, арнайы келіп тамашалады. Жылы лебізін білдірді. Біздің қорда 4 мыңнан астам картина бар. Бүгінгі көрме сәуірде ашылды, келесі аптада басқа көрме жұмысын бастайды. Көрмеге 200-ге жуық туынды қойылды», - деді Ұлттық музей директорының ғылыми жұмыстар жөніндегі орынбасары Ақмарал Ибраева.
Мерейтойлық көрмеге ұлттық музей қорындағы Әбілхан Қастеев, Әубәкір Ысмайылов, Орал Таңсықбаев, Салихитдин Айтбаев, Үкі Әжиев, Айша Ғалымбаева, Гүлфайрус Ысмайылова, Камиль Муллашев, Амандос Ақанаев, Ерболат Төлепбай, Алпысбай Қазғұлов, Ағымсалы Дүзелханов және тағы басқа көптеген қазақстандық танымал қылқалам шеберлерінің туындылары қойылған.
Ұйымдастырушылардың айтуынша, туындылардың басым бөлігі халыққа алғаш рет көрсетіліп отыр. қазақстандық суретшілердің туындыларының каталогының тұсаукесер рәсіміне Қазақстан жазушылар одағы басшылығы, Ұлттық музей қызметкерлері, танымал суретшілер мен өнертанушылар қатысты.
