Ұлттық банк қыркүйек және қазанда биржадағы сауда-саттыққа араласқан жоқ
«Ұлттық банктің негізгі міндеті - инфляцияны басқару және бағаның тұрақтылығын қамтамасыз ету. Біз 2016-2017 жылдарға инфляцияны 6-8 пайыз дәлізінде ұстауды негізгі көрсеткіш ретінде белгілеп отырмыз. Алдағы уақытта, 2020 жылдарға қарай 4 пайызға дейін төмендетуді көздеп отырмыз», - деді Д.Ақышев.
Оның айтуынша, Ұлттық банк қаржы-несие саясаты саласында таргеттеу деңгейіне жетуге барлық мүмкіндікті пайдаланады. Сонымен қатар, Үкімет, жергілікті атқарушы органдар бағаның негізсіз өсуіне жол бермеу үшін белсенді жұмыс жүргізуі тиіс.
Интернет қолданушылардың валюта бағамын еркін айналымға жіберу инфляцияның өсуіне алып келген жоқ па деген сауалына жауап берген Данияр Ақышев:
«Еркін валюта бағамын енгізу инфляциялық таргеттеу режіміне көшу аясындағы мәжбүрлі шара болды. Теңгенің ыңғайлы бағамы дер кезінде сыртқы ортадағы өзгеріске тез әрекет етуге мүмкіндік туғызады. Ол экономикада баланстың бұзылуының алдын алады және елдің алтынвалюталық қорын сақтауға жәрдемдеседі», - деп жауап берді Д.Ақышев.
Нәтижесінде еліміздің қаржы нарығындағы жағдай қалыпқа түсті. Ұлттық банк қыркүйек және қазан айында биржадағы сауда-саттыққа мүлдем араласқан жоқ.
«2016 жылдың қазан айында теңге 0,1 пайызға күшейіп, 1 АҚШ доллары үшін 335,46 теңгеден 335,12 теңгеге дейін күшейді», - деді ол.
Базалық ставкаға байланысты да қойылған сұрақтарға Данияр Ақышев жауап берді.
«Базалық ставка орнатылған күннен бастап, үш рет ақпан айындағы 17 пайыздан қазан айында 12,5 пайызға дейін төмендетілді», - деді ол.
Оның айтуынша, инфляциялық үдерістердің баяулауы және жылдық инфляцияның тұрақты төмендеу үрдісі нақтыланса, экономиканың ішкі және сыртқы секторындағы базалық ставка алда әлі төмендеуі мүмкін.
Айта кетейік, биыл 14 қарашада Ұлттық банк базалық ставка бойынша кезекті шешімін жария етеді.