«Ұлы Дала елі» экспедициясының эстафетасы Семейге келді (ФОТО)
Павлодардан бастау алған эстафета қонақтарын қаланың кіреберісінде ШҚО бойынша ҚХА төрағасының орынбасары Еркімбек Аязбаев бастаған Қазақстан халқы Ассамблеясының мүшелері қарсы алды.
Бұдан бұрын хабарланғандай, Қазақстан халқы Ассамблеясы Қазақ хандығының 550 жылдығына арналған «Ұлы Дала елі» тарихи-мәдени экспедициясына бастамашы болды. Ұлысаралық тағаттылық пен қоғамдық келісімнің қазақстандық моделін насихаттау жөніндегі тарихи республикалық лекторийдың жолбағыты жасалды. Қазақстанның үш қаласынан - Астана, Ақтау және Павлодардан бастау алған бірнеше топ бүкіл елді аралап, сапарын 9 қазанға дейін жалғастырады.
Павлодар облысы ҚХА төрағасының орынбасары Сейсенбай Жетпісбаевтың айтуынша, Павлодарда эстафета Достық үйі жанынан жолға шыққан.
«Бір апта ішінде, 11 қыркүйектен бастап біздің ғалым-тарихшыларымыз, мәдениет, мұражай, қызметкерлері, қоғамдық және этномәдени орталықтардың өкілдері облыстың көптеген тарихи орындарында болды. Олардың зерттеген деректері экспедицияның арнайы күнделігіне жазылып отырылды. Экспедицияға қатысушылар Баянауыл ауданының тарихи орындарына баса көңіл бөлді, бұл өңір Баян және Жасыбай сияқты батырлардың есімдерімен тығыз байланысты. Сондай-ақ осы өңірде көптеген атақты ғалымдар, жазушылар, қоғам қайраткерлері дүниеге келген. «Қазақстан энциклопедиясы» болашақ ауқымды интернет-жобасына қатысты көптеген қызықты деректер Май және Ақтоғай аудандарынан, Екібастұздан жиналды», - деді С.Жетпісбаев. .
Енді экспедиция ШҚО бойынша жолын одан әрі жалғастырады. Оған қатысушылар Өскеменде, Аягөз ауданының елді мекендерінде болып, 24 қыркүйекте Үшаралда Алматы облысының делегациясына эстафетаны тапсырады.
Еске сала кетейік, республикалық тарихи-мәдени «Ұлы Дала елі» экспедициясы өз жұмысын 9 қазанда Тараз қаласында өтетін Қазақ хандығының 550 жылдығына арналған жалпыреспубликалық мерекеге аяқтайды. Шығыс Қазақстан бұл оқиғаға арнап, театр спектакльдерін, Өскемен мен Семей мұражайларының мәтериалдарын, Абайдың әдеби-мемориалдық мұражайының жәдігерліктерін және республикалық экспедиция болған елді мекендерден тапқан деректерді әзірлейді.