Ұлытау облысында биыл 28 көпқабатты тұрғын үй бой көтермек
2023 жылы Ұлытау облысында 1812 жәңа пәтердің кілті тапсырылыуы тиіс.
Өңірдің қалалары мен аудандарында жалпы ауданы 120 мың шаршы метрді құрайтын 28 көпқабатты тұрғын үй құрылысы жоспарланған.
Оның ішінде республикалық бюджет қаражаты есебінен 14 көпқабатты тұрғын үй бой көтермек.
Жезқазған қаласында Алашахан және Гагарин көшелерінде 298 пәтерлі 6 тұрғын үй салынады.
Ал Сәтбаев қаласында Шаталюк, Құнанбаев және Тәуелсіздік көшелерінде 3 тұрғын үй құрылысы басталған.
Сонымен қатар аудандарда да қарқынды құрылыс жұмыстары басталып кеткен.
Жаңаарқа ауданында 5 тұрғын үйден келесі жылға дейін 228 пәтердің кілті табысталады деп көзделіп отыр.
Бұдан бөлек жеке құрылыс салушылармен Жезқазған торабында 4 үйдің және Сәтбаев қаласында 2 тұрғын үй құрылысын бастау жоспарлануда.
«Облыс бойынша 5000-нан астам адам баспанаға кезекте тұр. Ол үшін біз қалалық және республикалық бюджеттен ақша сұратып жатырмыз. Республикалық бюджеттен 7 несиелік үй салуға өтінім өткізіп қойдық. Қазір соны күтіп отырмыз. Одан бөлек жеке кәсіпкерлердің салып жатқан үйлері бар», - деп мәлімдеді Ұлытау облысының құрылыс, сәулет және қала құрылысы басқармасы басшысының м.а. Бақтияр Пардабеков.
Сондай-ақ, биыл Президенттің тапсырмасына сәйкес орталық мемлекеттік және құқық қорғау органдарының бөлімшелеріне орналастырылған мемлекеттік қызметшілерді тұрғын үймен қамтамасыз ету үшін ҚР Үкіметінің резерві есебінен 11 көпқабатты тұрғын үйдің құрылысын бастау жоспарланған.
«Екі үйдің құрылысы басталды. Жалпы 7 үйдің құжаты сараптамадан шықты. Қалған 4 үйдің құжаттарын күтіп отырмыз. Жақын арада шығады. Содан соң бюджеттік өтінімге өткіземіз. Бірақ мердігерлер оған қарамай, қазір өз қаражаты есебінен 2 үйдің құрылысын бастап кетті. Қалған 5 үйдің қазан шұңқырын қазу жұмысы жүріп жатыр. Негізі жоспар бойынша ол 2023-2024 жылдарға арналған», - деп толықтырды Бақтияр Пардабеков.
Сонымен қатар әлеуметтік салада кешенді даму жоспарына сай Ұлытау облысында 47 жаңа нысан салынады деп көзделген.
Биыл құны 1,47 млрд теңге болатын Жезқазған қаласындағы Абай атындағы мамандандырылған дарынды балалар мектебі үшін 200 орындық жатақхана салу жоспарланған.
Нысан 2024жылы пайдалануға берілуі тиіс.
Жезқазған қаласының қолданыстағы Бас жоспары 2015 жылы бекітілген.
Облыс орталығы мәртебесіне ие бола отырып, мәдениет, білім беру, спорт, денсаулық сақтау, әкімшілік және рекреациялық мақсаттағы жаңа нысандарды және басқа да ғимараттарды орналастыру қажеттігі туындаған.
Осыған байланысты қазіргі уақытта қала аумағын 2 100 гектарға дейін дамыта отырып, құрылған қаланың бас жоспары түзету сатысында.
2023 жылдың тамызында толығымен жасалып бітуі тиіс.