Үндістаннан Қазақстанға бағыт алған алғашқы жүк пойызы жолға шықты
ТАШКЕНТ. KAZINFORM — Үндістан мен Қазақстанды байланыстыратын алғашқы жүк пойызы жолға шықты, деп хабарлайды Kazinform агенттігінің меншікті тілшісі.
«Ўзбекистон темир йўллари» компаниясынан мәлім еткендей, аталған маршрут бойынша пойыз қатынасын жолға қоюға өзбек тарапы қолдау көрсетіп отыр.
— Көлік дәліздерін кеңейту және халықаралық жүк тасымалын дамыту мақсатында «Ўзтемирйўлконтейнер», «ТЛЦТ» и «Кедентранссервис» компанияларының қолдауымен пойыз қатынасы жолға қойылды, — делінген өзбекстандық компания таратқан хабарламада.
12 контейнер тиелген құрам Үндістанның «Мундра» портынан шығып, Қазақстандағы «Сороковая» станциясына барады. Жоспарға сай, пойыз Иран, Түрікменстан және Өзбекстан аумағы арқылы өтеді. Ол теңіз жолымен — 1,5 мың, теміржол желісімен 4 мың шақырымды еңсереді.
Айта кетейік, осыған дейін бұл бағыт бойынша Үндістаннан Өзбекстанға жүк тасымалданған еді.
«Ўзбекистон темир йўллари» компаниясының мәліметінше, жүк тасымалы үшін «Үндістан — Орталық Азия» дәлізін тұрақты негізде қолдану жоспарланып отыр.
Еске салайық, бұған дейін Қазақстан мен Өзбекстан арасында қосымша 4 сауда дәлізі ашылуы мүмкін екенін жазып едік.
Мұнымен бірге, Қазақстан мен Өзбекстанды байланыстыратын жаңа теміржол желісі салынып жатыр. Ол 2027 жылы пайдалануға берілмек.
