Универсиада алтынына үміткер Вишневская жарыс жолынан шығып қалды

АЛМАТЫ. ҚазАқпарат - Қазақстанның биатлоншы қыздары 10 шақырымға арналған із қуып жарысу сайысында жүлдесіз қалды, деп хабарлайды ҚазАқпарат.

Бүгін «Алатау» шаңғы-биатлон кешенінде қыздар арасында із қуып жарысудан сайыс аяқталды.

Бұл қашықтықта украиндық спортшы Надя Белкина бірінші келсе, екінші болып ресейлік Ольга Шестерикова, үшінші болып оның отандасы Лариса Куклина келді.

Қазақстандық үздік спортшы Дарья Усанова алтыншы болып жарыс жолын аяқтады.

Универсиада алтынының иегері Галина Вишневская сайыс регламентін сақтамағаны үшін жарыс жолынан шығарылды.

Еске сала кетейік, бүгінде Қазақстан құрамасының қоржынында 6 алтын, 2 күміс, 7 қола бар.