Универсиададан кейін Атлетикалық ауылдың 2 мыңға жуық пәтері тұрғындарға таратылады - Қ. Оразбеков

АЛМАТЫ. ҚазАқпарат - Алматыда 2017 жылы өтетін қысқы Универсиадаға арналып салынып жатқан Атлетикалық ауылдың тұрғын үйлік ғимараттары жарыстар аяқталған соң, «Қол жетімді баспана» бағдарламасы бойынша тұрғындарға таратылады. 2 мыңға жуық отбасы пәтерлі болады. Бұл туралы бүгін Алматыда Универсиада нысандарына жасалған баспасөз-туры барысында «Элитстрой» құрылыс компаниясының президенті Қайрат Оразбеков мәлімдеді.

Оның айтуынша Атлетикалық ауылдың тұрғын үйлік ғимараттары «Қазақстан Ипотекалық Компаниясы» АҚ Өңірлерді дамытудың 2020 жылға дейінгі бағдарламасы және «Қол жетімді баспана-2020» мемлекеттік бағдарламасының талаптарына сәйкестендіріліп салынып жатыр.

«Жоба бойынша 36 шаршы метрден 45 шаршы метрге дейінгі, 48-ден 56-ға және 64-тен 89 шаршы метрге дейінгі пәтерлер универсиада ойындары аяқталған соң, арнайы бағдарламалар бойынша кезекте тұрған тұрғындарға таратылып беріледі. Қазір, әрине, мұнда бөлмелер спортшылар үшін трансформерлер түрінде салынып жатыр. Ал ойындар аяқталып, спортшылар елдеріне қайтқан соң, 2-3 ай көлемінде бөлмелер қайта жасақталады. Яғни сызылған, кертілген жерлері жөнделеді, жаңадан есіктер салынады, сөйтіп 1-2-3 бөлмелі пәтерлерге айналдырылып тұрғындарға таратылады. Жалпы 1780 пәтерді тұрғындарға беру жоспарланып отыр», - деді өз сөзінде Қ. Оразбеков.

Ол сонымен қатар, «Элитстрой» құрылыс компаниясы салып жатқан Атлетикалық ауылдың құрылысы қарқынды жүріп жатқандығын жеткізді.

«Біз салыну кестесінің уақытынан 30-40 күн алда келеміз. Құдай қаласа, 2016 жылдың тамыз айының аяғы мен қыркүйек айының басында ауыл қолданысқа беріледі. Қазір жалпы құрылыстың 25 пайызы игерілді. Универсиаданың өткізу тұжырымдамасы бойынша Атлетикалық ауыл - 10 блоктан тұратын қалашық. Бір блоктың ауданы 7 мың шаршы метрді құрайды. Жоғарыдан қарағанда қалашық «U» әріпін көзге елестетеді. Атлетикалық ауыл 5000-ға жуық спортшыны қабылдауға шақталған. Жалпы ауданы 20 гектардан астам жерді алып жатыр. Тұрғын үйлік ғимараттардың жалпы көлемі 124 901 шаршы метрді құрайды. Сонымен қатар, мұнда тұрғын үйлермен қоса спорт кешені, супермаркет, медициналық орталық, кинотеатр, бассейн, стадион және басқа да инфрақұрылымдар бой көтереді. Ауылдың барлық аумағында Wi-Fi қолжетімді болады», - деді Қ. Оразбеков.

Айта кетелік, Атлетикалық ауыл Момышұлы көшесі мен Рысқұлов даңғылына жақын жерде және 12 000 орындық мұз айдынының іргесінде орналасқан.