Универсиаданың сәтті өтуіне көмектескен еріктілерге алғыс айтылды
Жабылу шарасында еріктілерге арналып «Мың бұралған Алматы» әні шырқалып, еріктілер би биледі.
Айта кетейік, еріктілер арасында 78 жастағы канадалық Энтони Майкл Хиллдің есімі мен 3-ші топ мүгедегі Серік Есмановтың есімі ерекше аталды.
Бүгін Алматыда 28-ші Бүкіләлемдік қысқы Универсиаданың жабылуы өтіп жатыр.
Оған 57 елден 2000 мыңға жуық спортшы қатысуда.
Салтанатты шараға ҚР Үкімет басшысы Бақытжан Сағынтаев, Халықаралық студенттер спорты федерациясының Президенті Олег Матыцин, Алматы әкімі Бауыржан Байбек және келесі Универсиада ойындарын өткізетін Ресейдің Красноярск өлкесінің басшылығы қатысуда.
Универсиаданың жабылу рәсімі жезтаңдай әнші Ардақ Балажанның ән шашуымен басталды. Келесі кезекте Жәмила Серкебаева скрипкада Түркештің «Көңіл ашар» күйімен әрлей түсті. Ал «Ұлытау тобы» Махамбеттің «Жұмыр қылыш» күйін төгілтті.
Айта кетейік, Универсиада ойындарына 85 медаль жиынтығы сарапқа салынды. Жалпы командалық есепте Ресей командасы бірінші орын алды. Олардың еншісінде 28 алтын, 27 күміс және 15 қола медаль бар. Екінші орында Қазақстан құрамасы. Біздің спортшылар байрақты бәсекеде 11 алтын, 8 күміс және 17 қола жеңіп алды. Үздік үштікті Оңтүстік Корея түйіндеді. Бұл елдің спортшыларында 11 алтын, 5 күміс және 5 қола медаль бар.