Уругвайдағы су тасқыны кезінде 1,7 мың адам үйін тастап кетті

АСТАНА.ҚазАқпарат - Уругвайдың солтүстігіндегі нөсер жауыннан кейінгі су тасқыны салдарынан 1750-ге жуық адам өз үйлерінен кетуге мәжбүр болды. Бұл жайлы елдің төтенше жағдайлар жөніндегі ұлттық басқармасы хабарлайды (SINAE).

«Соңғы мәліметтерге сүйенсек, тасқын салдарынан өз үйлерінен кеткен тұрғындар саны 1 754-ке жеткен. Олардың ішінде 573 адам басқа жерге көшірілді, 1 098  адам өз еркімен кетті», делінген.

Ресейлік ТАСС агенттігінің хабарлауынша, 1 299 тұрғыны өз үйлерін еріксіз босатқан Сальто департаментіндегі жағдай тіпті қиын. Сондай-ақ, Пайсанду, Артигас департаменттері де су тасқынынан зардап шекті.

Биліктің мәлімдеуінше, көшірілгендердің барлығына уақытша тұрғын үй беріліп, қажетті көмек көрсетілген.

Нөсер жауын Уругвайдың солтүстігіне өткен аптада жауды. Метеорологтардың болжауынша жақын үш күнде жауын толастап, келесі аптада қайтадан күшіне енуі мүмкін. Сел салдарынан бірнеше жолдарды да су басып қалды.