US Open: Ярослава Шведова аралас сында жартылай финалға өте алмады
НҰР-СҰЛТАН. ҚазАқпарат – Қазақстандық Ярослава Шведова аралас жұптық сында US Open турнирінің жартылай финалына өте алмады, деп хабарлайды ҚазАқпарат тілшісі.
Қазақстан әйелдер құрамасының капитаны Ярослава Шведова франциялық Фабрис Мартенмен бірге ширек финалда украиналық Даяна Ястремская – аустралиялық Макс Перселмен күш сынасты.
Бұл бәсекеде украиналық-аустралиялық жұп 6:2, 6:3 есебімен жеңіске жетті.
Небәрі бір сағатқа жуық созылған матчта қазақстандық-франциялық жұп 1 эйспен шектеліп, брейк жасай алмады. Қарсыластары 4 эйс, 3 брейкке қол жеткізді.
Осылайша АҚШ ашық чемпионатында Қазақстаннан ешкім қалмады.
Еске сала кетейік, бұдан бұрын Қазақстан чемпионатында 100-ден астам спортшы бақ сынайтынын, US Open турнирінде Андрей Голубевтің жұптық сында ширек финалға шыға алмағанын жазған болатынбыз.
