Үш дүркін Олимпиада чемпионы допинг дауына ілікті

АСТАНА. ҚазАқпарат - UWW (Біріккен күрес әлемі) ұйымының ресми сайты еркін күрестен Олимпиаданың үш дүркін чемпионы және екі дүркін әлем чемпионы өзбекстандық Артур Таймазовтың допинг қолданғанын жариялады, деп хабарлайды ҚазАқпарат тілшісі.

Аталған мәліметке сүйенсек, Артур Таймазовтан 2008 жылғы Бейжің Олимпиадасының алтыны тартып алынған. Оған себеп, WADA ұйымының тексерісінен кейін балуанның қанынан туринабол дәрмегі табылған. Нәтижесінде, Қытай елінде өткен басты додада екінші орын алған ресейлік Бахтияр Ахмедовке Олимпиада алтыны бұйырды. Ал күміс медаль Словакия атынан өнер көрсеткен тағы бір осетиялық балуан Давид Мусульбеске берілмек.

Айта кетейік, Артур Таймазов 1979 жылы Солтүстік Осетияда дүниеге келген. 3 дүркін Олимпиада чемпионы және бір мәрте күміс жүлдегері, 2 дүркін әлем чемпионы, 3 дүркін Азия ойындарының жеңімпазы және көптеген халықаралық жарыстарда топ жарған балуан.