Үш қалада салынатын ЖЭО-лар «Самұрық-Энерго» теңгерімінде болады

АСТАНА. KAZINFORM — Көкшетау, Семей және Өскемен қалаларында салынатын ЖЭО-лар «Самұрық-Энерго» теңгерімінде болады. Бұл туралы Премьер-Министрдің орынбасары — Ұлттық экономика министрі Нұрлан Байбазаров мәлім етті.

Бүгін Парламент Мәжілісіндегі баспасөз мәслихатында тілшілер еліміздің үш қаласында салынатын жылу электр орталықтарына Ресей жағы қанша несие бөлетінін сұрады. 

«Жылу электр орталықтары «Самұрық-Энерго» теңгерімінде болады, яғни мемлекеттік активтер ретінде қарастырылып отыр. Бұл тұрғыда басқа иелері ескерілмеген. Оны салу мерзіміне қатысты Энергетика министрлігі алдағы уақытта мәліметті таратады. Ал несие сомасы жөнінде қазір нақты деректер жоқ, себебі келіссөздер қарқынды жүріп жатыр. Осы келіссөздерге Қаржы министрлігі мен Ұлттық экономика министрлігі қатысады», — деді Н. Байбазаров.

Бұдан бұрын хабарланғандай, Парламент Мәжілісінің қарауына «Қазақстан Үкіметі мен Ресей Үкіметі арасындағы Қазақстан Республикасының аумағында Көкшетау, Семей және Өскемен қалаларында көмір жағатын жылу электр орталықтарын салу жобалары туралы келісімді ратификациялау туралы» заң жобасы келіп түсті. 

Келісім жабдықтарды жобалау, дайындау және жеткізу, жаңа жылу орталықтарын салу әрі пайдалануға беру жөніндегі жұмыстарды, сондай-ақ Қазақстан жағына Ресейдің мемлекеттік экспорттық кредитін беруге жеңілдікті қаржыландыру тетіктерін орындау шарттарын айқындайды.