Үш өңірдегі жылу электр орталықтарының құрылысы қашан басталады
АСТАНА. KAZINFORM – Көкшетау, Семей және Өскемен қаласында жаңа жылу электр орталықтары салынады. Құрылыс туралы «Самұрық-Энерго» АҚ басқарма төрағасы Қайрат Мақсұтов айтып берді.
- Үш жылу электр орталығының (ЖЭО) құрылысына қатысты үкіметаралық келісімдерге қол қойылғаны белгілі, қазір жұмыс жобалау кезеңінде, яғни жобалау-сметалық құжаттама әзірленіп жатыр. Жобалау кезеңі аяқталмайынша және сараптамадан өтпейінше, біз әзірге жобаның құны туралы айта алмаймыз, - деді Қайрат Мақсұтов «Самұрық-Қазына» ұлттық компаниясында өткен іс-шара барысында.
Осы орайда БАҚ өкілдері «Самұрық-Энерго» басшысынан жаңа жылу электр орталықтарының құрылысына қатысты нақтылауын сауалын қойды.
- Көкшетау ЖЭО бойынша дайындық жұмыстарын бастадық, жаз бойы дайындық жұмыстарын жалғастырамыз. Құрылыс белсенді түрде жыл соңында басталып, 2026 жылы аяқталады. Сондай-ақ, биыл жабдыққа тапсырыс беріледі, - дейді ол.
Еске салсақ, былтыр сәуірде Қазақстан Республикасы мен Ресей Федерациясының энергетика министрліктері арасында Көкшетау, Семей және Өскемен қалаларында ЖЭО салу жобалары бойынша ынтымақтастық туралы келісімге қол қойылды.
Кейін еліміздің үш қаласында салынатын жылу электр орталықтары «Самұрық-Энерго» компаниясының теңгерімінде болатыны белгілі болды.
Энергетика министрлігінің ақпараты бойынша Көкшетаудағы жылу орталығы 2029 жылы, Өскемендегі орталық 2031 жылы, ал Семейдегі орталық 2032 жылы толық пайдалануға беріледі.
Айта кетейік, бүгін «Самұрық-Қазына» ұлттық компаниясының қоғамдық кеңесінің отырысы өтті. Ол жерде «Самұрық-Энерго» компаниясының өткен жылғы жұмыс есебі мен биылғы жоспары талқыланды.
