Үш рет саудаға түскен Қостанай әуежайы неге сатылмай жатыр

АСТАНА. KAZINFORM – Қостанайдың әуежайы 2020 жылдан бері үш рет саудаға қойылып, сатылмай қалған. Істің мән-жайын облыс әкімі Құмар Ақсақалов түсіндірді.

- Әуежай 2020 жылы жекешелендіру жоспарына енгізілді. Содан бері үш рет саудаға түсті, соңғы сауда осыдан бірер күн бұрын өтті. Бірақ сауда болмады, енді әуежай коммуналдық меншікте қалады, бұдан былай саудаға шығарылмайды. Әуежайдың жағдайына келер болсақ, жаңғырту бойынша ауқымды жұмыс істелді. Өткен жылы ұшақтың көлеміне, түріне байланысты қосымша тұрақ орындары ашылды, қазір екіден жеті ұшаққа дейін тұраққа қоюға болады. Сонымен қатар, әуежайдың аумағы 30%-ға ұлғайды. Осылайша заманауи ұшу және қону залы ұйымдастырылды, - деп жауап берді Құмар Ақсақалов өңірдің әлеуметтік-экономикалық дамуы туралы есеп беру барысында БАҚ өкілдерінің сауалына жауап беріп.

Осылайша, әкім қалалық әуежайдан әлдеқайда жаңарғанын айтып отыр.

- Бұқаралық ақпарат құралдары біраз жылдар бұрын әуежайдың нашар жағдайы туралы жазды, фотосуреттерді көрсетті, екінші қабатқа көтерілетін баспалдақтың қабырғаға тірелген сәті де таралды. Алдағы уақытта 800 шаршы метр халықаралық ұшулардың толыққанды залы болу үшін қалпына келтіріледі. Бұл бағыттағы жұмысты жалғастырамыз, келесі жылы аяқтаймыз деп үміттенемін, - деп қорытындылады өңір басшысы.

Бұған дейін хабарлағанымыздай келесі жылы Қостанайда кореялық KIA көлігін шығара бастайды. 

Айта кетейік, Қостанай облысында еліміздің оңтүстік өңірлерінен солтүстікке көшу бағдарламасының арқасында дәрігерлер тапшылығы азайды.