Ұшақ апаты: Ақтауға дәрігерлер жіберіледі
АСТАНА. KAZINFORM – Денсаулық сақтау министрі Ақмарал Әлназарова Ақтауда апатқа ұшыраған ұшақ жолаушыларына медициналық көмек беру жұмыстарына қатысты түсінік берді.
- Оқиға орнына 14 жедел жәрдем бригадасы шығып, республикалық штаб құрылды. Сол жерге вице-министр кетті. Қазір біз санитарлық авиацияның борттарын дайындадық, ол жерге мамандарды, травматологтарды, нейрохирургтерді және басқа да дәрігерлерді жібереміз. Сол жерде медициналық көмек беріледі, сондай-ақ қажет болған жағдайда оларды тасымалдаймыз. Тиісті жұмыстар атқарылып жатыр, - деді А. Әлназарова Парламент Мәжілісіндегі тілшілер сұрағына жауап бере отырып.
Бұдан бұрын хабарланғандай, Ақтауда Azerbaijan Airlines ұшағы апатқа ұшырады.
Оқиға орнына ҚР Төтенше жағдайлар министрлігі жеке құрамының 52 адамы мен 11 бірлік техникасы барды.
