Ұшақ апатынан қаза тапқан қазақстандықтардың мәйіті Отанына жеткізілді
«Айжан Исенғалиева, Ербол Иманқұлов пен ұлы Әділдің мәйіттері 18 маусым күні «Майндағы Франкфурт - Алматы» рейсімен Қазақстанға жеткізілді», - деп хабарлады ҚР СІМ баспасөз қызметінен. Марқұмдардың денелері Өскемен қаласына жеткізілген.
Еске сала кетейік, наурыз айында Барселонадан Дюссельдорфқа бағыт алған ұшақ апатқа ұшырап, салдарынан ұшақ бортындағы 150 адам қаза тапқан болатын.
Ұшақ апатында қаза тапқандар қатарында қазақстандықтар да болған. Олар: «Қазцинк» ЖШС директорының орынбасары Айжан Исенғалиева, оның жолдасы Ербол Иманқұлов және ұлдары - Әділ.
«Қазцинк» ЖШС атқарушы директоры Андрей Лазаревтің айтуынша, қаза тапқан Айжан Исенғалиева компания қызметкерлері және олардың отбасыларының демалысын ұйымдастырумен айналысқан.
Ербол Иманқұлов та бұрын «Қазцинкте» қызмет етіп, «Жаңа металлургия» мыс зауыты жобасына жетекшілік жасаған. Жоба аяқталған соң, Қарағандыдағы «Тау-Кен Темір» компаниясын басқарады.
Айжан Исенғалиеваның таныстарының айтуынша, Өскеменде виза рәсімделмегендіктен қаза тапқан отбасының 14 жастағы қызы Испанияға кете алмай, аман қалған.