Ustaz Ulytau ПТО жобасын іске асыру оқушылардың білім сапасын арттыруға қалай әсер етеді
АСТАНА. KAZINFORM — Ustaz Ulytau жобасы іске қосылғалы «Қазақмыс Корпорациясы» ЖШС қатысқан өңірлердегі мектептерден 3000-нан астам педагог түрлі біліктілікті арттыру курстарынан өтті. Жоба жұмысының арқасында мектеп оқушыларының білім сапасы артқаны да байқалады, деп хабарлайды Kazinform агенттігінің тілшісі.
Мектеп — бұл жай ғана білім ошағы емес, бұл жеке тұлғалар қалыптасатын, өз ісінің болашақ кәсіпқойлары тәрбиеленетін орын. Ал осы қасиеттерді баланың бойына дарыту педагогтардың еңбегі. Өңірлердің тұрақты дамуын қамтамасыз етуде орта білім сапасының маңыздылығын ескере отырып, «Қазақмыс корпорациясы» ЖШС бастамасы бойынша 2021 жылдан бастап білім сапасын арттыру бойынша инновациялық жоба іске асырылуда. «The Ulytau educational foundation» қайырымдылық қоры «Қазақмыс» корпорациясының сұрауы бойынша Ustaz Ulytau педагогикалық трансформация орталығын құрды. Корпорацияның қаржылай қолдауымен қор компанияның жұмыс жасап жатқан аймақтарында: Жезқазған, Сәтпаев қалаларында және Ұлытау облысының Ұлытау ауданында, Балқаш қаласында және Қарағанды облысының Қарқаралы, Осакаров, Абай, Бұқар жырау аудандарында, сондай-ақ Жамбыл облысы Шу қаласында кешенді жұмыстарды орындайды.
Жұмыс 7 негізгі бағыт бойынша жүргізіледі (аккредиттеу, кәсіптік бағдарлау, интернационалдандыру, ТТМСО, STEM, CLIL, басқару тиімділігін арттыру).
Ustaz Ulytau ПТО-ның түрлі жобаларына қатысатын мұғалімдердің көбісі кәсіби тұрғыда өсу мүмкіндіктеріне ие болғанын айтады.
— Жобаға қатысу мен үшін бірқатар әлеуеттерді ашты, мен инновациялық білім беру құралдары және платформаларымен таныстым, оларды енді оқу процесіне біріктіре аламын. Бұдан басқа, бұрын сирек қолданған пәнаралық тәсілдердің әлеуетін сезіндім. Енді әр түрлі пәндерді біріктіретін сабақтар әзірлеуді жоспарлап отырмын. Қазіргі заманғы әдістемеге деген көзқарасым айтарлықтай өзгерді. Бұрын мен цифрлық құралдарды дәстүрлі әдістерге қосымша ретінде қабылдадым, бірақ жоба технологиялардың оқытуды қалай өзгертіп, оны интерактивті және дербес ете алатынын көрсетті. Сонымен қатар, мен білім беру үдерісіндегі оқушының рөлін қайта қарадым: енді материалды есте сақтауға емес, жобалық жұмыс пен сыни ойлауды дамытуға баса назар аударамын, — дейді Сәтбаев қаласындағы «№ 4 Абай атындағы мектеп-лицейі» КММ директорының оқу жұмысы жөніндегі орынбасары Меруерт Әбішева.
Қордың ағылшын тілі оқытушыларын дамыту бағдарламаларына қатысу педагогтарға бірқатар құнды мүмкіндіктер берді.
— Біріншіден, мен IELTS тапсыруға мүмкіндік алдым, бұл менің кәсіби көкжиегімді кеңейтті. Екіншіден, King’s Oxford (Ұлыбритания) тағылымдамасы ағылшын тілін оқытудағы білімді тереңдетіп қана қоймай, оқытудың озық әдістерімен де танысуға мүмкіндік берді. Балалардың King’s Bournemouth-қа сапарын ұйымдастыруға қатысу маңызды жетістіктердің бірі болды, онда олар ағылшын тілді ортаға еніп, өте құнды тәжірибе жинақтады. Қордың арқасында мен International Foundation бағдарламасының жаттықтырушысы болдым. Қор бағдарламаларына қатыса отырып, жеке көзқарастың және оқытуда заманауи технологияларды пайдаланудың қаншалықты маңызды екенін көрдім. International Foundation-дағы жұмыс дәстүрлі әдістер қазіргі заманғы оқушылардың қажеттіліктеріне, әсіресе IELTS сияқты халықаралық емтихандарға дайындық жағдайында бейімделуді талап ететінін растады, — деп бөлісті Жезқазған қаласының «Абай атындағы мамандандырылған мектеп-гимназиясы» КММ ағылшын тілі мұғалімі Медет Жанділдинов.
Қысқы стратегиялық сессия барысында мектеп директорларына арналған «The Ulytau Educational Foundation» қоғамдық қайырымдылық қорында 16-22 ақпанда білім беру, өзгерістерді басқару, мектеп ішіндегі бақылауды тиімді ұйымдастыру, өзін-өзі ұйымдастыру және мектеп директорларының жеке тиімділігі саласындағы белгілі қазақстандық және халықаралық сарапшылардың дәрістері мен тренингтері өткізіледі.
— Астанада «Қазақмыс корпорациясы» жұмыс істеп жатқан аймақтардан 15 мектеп директоры бір апта ішінде білім алып, біліктілігін арттырып қана қоймай, әріптестерімен де құнды байланыс орнату үшін жиналды. Біздің қордың барлық қызметі білім беру тәжірибесіне инновацияларды енгізуге, мұғалімдер мен мектеп менеджерлерінің біліктілігін арттыруға, халықаралық тәжірибе алмасуға мүмкіндіктер жасауға бағытталған, бұл нәтижесінде 85 мектепте орта білім беру сапасын айтарлықтай арттыруға алып келеді. Жобаның бірегейлігі — өңірлердегі мектептерге жүйелі, құрылымдалған көмек көрсету үшін ғылым мен тәжірибені, ірі бизнес пен мемлекеттің күш-жігерін біріктіру. Тартымды білім беру ортасын құру және мектептердің бәсекеге қабілетті түлектерін даярлау — жобаны іске асыру барысында шешілетін екі басым міндет, — дейді «The Ulytau Educational Foundation» ҚҚ директоры Марина Хан.
Қор жұмысы белсенді түрде жалғасып жатыр. 2025 жылдың 24-25 сәуірінде Қарағанды қаласында «Білім беруді дамытудың өзекті мәселелері: Проблемалар. Инновациялық шешімдер. Болжамдар» атты ІІІ Халықаралық, ылымиөпрактикалық конференция өтеді.
