В. Школьник Жапония экономика, сауда және өнеркәсіп министрімен энергетика саласындағы ынтымақтастықты талқылады

ӘБУ-ДАБИ. ҚазАқпарат - Әбу-Дабидегі IRENA агенттігі ассамблеясы бесінші сессиясының жұмысына қатысып жатқан Қазақстанның энергетика министрі Владимир Школьник сенбі күні бірқатар екіжақты кездесулер өткізді, деп хабарлады «ҚазАқпарат» ХАА-нің БАӘ-дегі меншікті тілшісі.

В.Школьник IRENA қайтарымды энергетика жөніндегі халықаралық агенттіктің атқарушы директоры Аднан Аминмен кездесті. Қазақстандық министр IRENA өкілін бесінші сессияда келесі мерзімге агенттіктің бас директоры болып сайлануымен құттықтады. Өз кезегінде, А.Амин Қазақстанға ұйым жұмысына белсене қатысқаны және энергияның қайтарымды көздерін дамытуға шынайы мүдделілік білдіргені үшін ризашылығын білдірді.

Сондай-ақ Қазақстанның энергетика министрлігінің басшысы Жапонияның экономика, сауда және өнеркәсіп министрі Еити Миядзавамен екіжақты кездесу өткізді. Тараптар энергетика саласындағы қазақстан-жапон қатынастарының ағымдағы жай-күйін талқылады. Жапондық министр Токионың атом энергетикасы саласындағы бірқатар перспективалық жобаларына қатысуды кеңейтуге мүдделілігін білдірді.

БҰҰ Бас хатшысының орынбасары - Азия және Тынық мұхит экономикалық және әлеуметтік комиссияның (ЭСКАТО) атқарушы директоры Шамшад Ахтар Қазақстанда «жасыл энергетиканы» дамытудың әлеуетін атап өтті. Оның айтуынша, болашақта Қазақстан, оның географиялық ыңғайлы орналасуын ескере отырып, балама көздерді өндіретін өңірлік энергия экспорттаушысы бола алады. Бұл орайда БҰҰ өкілі мен В.Школьник ЭСКАТО мен ҚР «Жасыл көпір» әріптестігі ауқымында бірлескен басымдықты талқылады.