Валюта бағамына апталық шолу: доллар 81 тиынға қымбаттады
АСТАНА. KAZINFORM — Қазақстанның валюта нарығында 12-16 қазан аралығында доллар бағамы әуелі төмендеп, кейін қайта өсті. Аптаның алғашқы екі сауда күнінде теңге нығайып, доллар 448,45 теңгеге дейін арзандады. Алайда апта ортасында бағыт өзгеріп, бейсенбіде америкалық валюта 454,14 теңгеге дейін қымбаттады. Жұмадағы саудада доллар қайта арзандап, 452,12 теңгеге түсті. Юань мен рубль де апта ортасында өскенімен, соңғы сауда күнінде аздап төмендеді.
Доллар: төмендеу мен қайта өсу
12 қазанда KASE-дегі күндізгі сауда қорытындысында доллардың орташа сараланған бағамы 451,31 теңге болды. 13 қазанда ол тағы 2,68 теңге арзандап, 448,45 теңгеге түсті. Осылайша, екі сауда күнінде доллар шамамен 5,3 теңге арзандады.
Бірақ 14 қазанда доллар 450,62 теңгеге дейін көтеріліп, 15 қазанда тағы 2,93 теңге қымбаттады. Бейсенбідегі саудада орташа сараланған бағам 454,14 теңгеге жетті. Жұмада теңге біршама нығайып, доллар бағамы 452,12 теңгеге дейін төмендеді.
Апта ішіндегі ең төмен және ең жоғары бағамның айырмасы 5,69 теңге болды. Дегенмен аптаның басы мен соңын салыстырғанда доллар 81 тиын ғана қымбаттады: 451,31 теңгеден 452,12 теңгеге дейін, яғни апта ішінде айтарлықтай құбылыс болғанымен, қорытынды өзгеріс шағын болды.
Юань: апта соңында қымбат күйінде қалды
Қытай валютасының KASE-дегі орташа сараланған бағамы 12 қазанда 67,4591 теңге болған. 13 қазанда 66,9690 теңгеге дейін төмендеп, 14 қазанда 67,4528 теңге, 15 қазанда 67,8729 теңге болды. 16 қазандағы сауда қорытындысында бағам 67,8010 теңгеге түсті.
Осылайша, аптаның басымен салыстырғанда юань 0,3419 теңгеге немесе шамамен 0,5% қымбаттады. Доллар сияқты, юань да апта ішінде төмендеп, кейінгі күндері қайта өсті.
Рубль: бірқалыпты қозғалыс
Ресей рублінің бағамы апта ішінде салыстырмалы түрде тар ауқымда өзгерді. 12 қазанда KASE-дегі орташа сараланған бағам 5,3742 теңге болды. 13 қазанда ол 5,3531 теңгеге дейін төмендеп, 14 қазанда 5,3741 теңгеге қайта көтерілді. 15 қазанда 5,4168 теңгеге жеткен рубль жұмада 5,4134 теңгеге дейін сәл арзандады.
Аптаның басымен салыстырғанда рубль 0,0392 теңгеге, яғни шамамен 0,7% қымбаттады. Демек, осы үш валюта ішінде апта қорытындысында рубль мен юаньның теңгеге шаққандағы бағамы өсті.
Апта қорытындысы
KASE-нің 16 қазандағы сауда қорытындысы бойынша, доллардың күндізгі сессиядағы орташа сараланған бағамы 452,12 теңге болды.
Америкалық валютамен жасалған мәмілелердің жалпы көлемі 349,623 млн АҚШ доллары, ал мәміле саны 913 болды.
Осы сессияда юаньның бағамы 67,8010 теңге, рубльдікі 5,4134 теңге деңгейінде қалыптасты. Юаньмен жасалған сауда көлемі 56,35 млн юань, рубльмен жасалған сауда көлемі 1,814 млрд рубль болып түйінделді.
Бұған дейін қор нарығында доллар бағамы қайта арзандағанын жазғанбыз.
