Ватикан Рим папасының ауруханаға түскеннен кейінгі алғашқы фотосуретін жариялады

АСТАНА. KAZINFORM – Суретте понтифик пневмониядан емделіп жатқан Римдегі Gemelli ауруханасына қарасты кішкентай шіркеуде жылжымалы орындықта отыр, деп хабарлайды ВВС.

Ватикан Рим Папасы Франциск бір айдан астам уақыт бұрын Римдегі ауруханаға түскеннен бері оның алғашқы суретін жариялады.

Жұма күні Рим Папасы Angelus жазбаша жолдауын таратып, онда «сынақ кезеңінен» өтіп жатқанын мойындады, жақсы тілектер үшін алғыс білдірді және «соғыс жаралап жатқан елдер: Украина, Палестина, Израиль, Ливан, Мьянма, Судан және Конго Демократиялық Республикасында» бейбітшілік үшін дұға еткенін айтты.

Рим Папасы жексенбілік дұғаға жеке қатыса алмай жүргенінен қатарынан бесінші апта болды. Ватиканның бұған дейін хабарлауынша, рентгенмен түсірілген суреттер оның жағдайының «біртіндеп жақсарғанын» көрсеткенімен, оған әлі де ауруханада күтім қажет болып отыр.

- Әулие Әке әлі де ауруханада емдік терапияны, моторлық және респираторлық физиотерапияны қажет етеді, - делінген Папаның жағдайы туралы сенбілік бюллетеньде.

Рим Папасы Франциск 88 жаста. Ол 14 ақпаннан бері көпшілік алдына шықпаған. Осы уақыт ішінде бүгінгі күнге дейін оның бірде-бір фотосуреті жарияланған жоқ.

Оның қос пневмония және басқа да инфекцияларға шалдыққаны хабарланды.

10 наурызда Рим папасы Францисктің дәрігерлері оның денсаулығына қатысты болжамды жақсартқанын жазған болатынбыз.