Венесуэла елдің әуе кеңістігін заңсыз кесіп өткен шағын ұшақты тоқтатты
АСТАНА. KAZINFORM — Венесуэланың Қарулы күштері (FANB) елдің әуе кеңістігін заңсыз кесіп өткен шағын ұшақты тоқтатқанын хабарлады.
Жергілікті БАҚ мәліметі бойынша, Кариб теңізіндегі аралдардың бірінен ұшып шыққан ұшақтың есірткі тасымалына қатысы бар. FANB күштері әуе кемесін Апуре штатындағы Ромуло Гальегос ауылдық аймағында, Колумбия шекарасында тоқтатып, бейтараптандырды.
Хабарламада CESSNA 310 типіндегі ұшақ радар арқылы анықталғаны, оның есірткі контрабандистерімен байланысы бар деп танылғаны және бұл операция контрабандистерге стратегиялық соққы болғаны атап өтілген.
Билік қауіпсіздік күштері заңсыз қарулы топтар мен есірткі саудасына қарсы операцияларын жалғастыра беретінін айтты. Алдыңғы аптада FANB бұдан бөлек тағы үш ұшақты Колумбия шекарасына жақын екі ауданнан бейтараптандырған. Олардың да есірткі саудасына қатысы бар екені анықталды.
Еске сала кетсек, АҚШ Венесуэла жағалауында есірткі тасымалдаушылардың кемесіне соққы жасады.
