Вьетнам парламенттік делегациясы Қазақстанға келеді
Вьетнам парламенттік делегациясы Қазақстанның Сенат және Мәжіліс төрағаларымен кездеседі. Бұл туралы ҚР Сыртқы істер министрлігінің ресми өкілі Айбек Смадияров айтты, деп хабарлайды ҚазАқпарат тілшісі.
«2023 жылғы 25-28 қыркүйек аралығында Вьетнам Коммунистік Партиясы Орталық комитетінің мүшесі және ВСР Ұлттық жиналысы Төрағасының бірінші орынбасары Нгуен Кхак Динь басқаратын парламенттік делегация Қазақстанға келеді», - деді А. Смадияров апталық брифингіде.
Оның айтуынша, сапар барысында Вьетнам өкілдерінің ҚР Парламенті Сенатының төрағасы Мәулен Әшімбаев, ҚР Парламенті Мәжілісінің төрағасы Ерлан Қошанов, ҚР Премьер-Министрінің орынбасары Серік Жұманғарин, Алматы қаласы әкімінің орынбасары Арман Қырықбаев пен ҚР Сыбайлас жемқорлыққа қарсы іс-қимыл агенттігінің төрағасы Асхат Жұмағалимен екіжақты кездесулері жоспарланған.
Бұдан бөлек, 25-27 қыркүйекте Бүкілқытайлық халық өкілдері жиналысы Тұрақты комитеті (БХӨЖ ТК) Сыртқы істер жөніндегі комитеті төрағасының орынбасары Хао Пиннің Қазақстанға сапары өтеді.
«Аталған сапар екі ел арасындағы парламентаралық өзара іс-қимылды одан әрі жандандыруға бағытталған. Сапар барысында ҚР Парламенті Мәжілісінде, Сыртқы істер министрлігінде, Қазақстанның стратегиялық зерттеулер институтында және Л. Гумилев атындағы Еуразия ұлттық университетінде кездесулер ұйымдастырылады», - деді ресми өкіл.
