Вьетнам үкіметі Telegram-ды бұғаттау туралы шешім қабылдады

АСТАНА. KAZINFORM — Вьетнам үкіметі телекоммуникация операторларынан Telegram-ды ел ішінде бұғаттауды талап етті. Бұған мессенджердің қылмыстық істер аясында үкіметке пайдаланушылардың деректерін беруден бас тартуы себеп болды, деп хабарлайды Reuters. 

Вьетнам Технология министрлігінің қаулысына сәйкес, телекоммуникация компаниялары Telegram-ды бұғаттау бойынша қабылданған шаралар туралы 2 маусымға дейін хабарлауы керек.

Сондай-ақ құжатта Вьетнам полициясы ұсынған деректер ұсынылған, оған сәйкес елдегі 9600 Telegram арнасының 68 пайызы заңсыз әрекеттермен, соның ішінде алаяқтықпен, есірткі саудасымен және «терроризммен байланысты» әрекеттермен айналысқаны анықталған.
Технология министрлігінің өкілі Reuters агенттігіне құжаттың түпнұсқалығын растады және бұғаттау туралы шешім Telegram жүргізіліп жатқан қылмыстық тергеу аясында үкіметке пайдаланушылардың деректерін беруден бас тартқандықтан қабылданғанын айтты.

Мессенджердің өзі әзірге жағдайға қатысты пікір білдірген жоқ.

Вьетнам Коммунистік партиясы бұқаралық ақпарат құралдарындағы қатаң цензураны қолдайды және Meta, Google, TikTok сияқты ірі компанияларға қорлау, жалған және үкіметке қарсы мазмұнды қамтитын «зиянды» материалдарды жою бойынша күш-жігерді үйлестіруді талап етіп, бірнеше рет жүгінгені атап өтілді.

Еске сала кетейік, Telegram алғаш рет 540 миллион доллар пайдаға кенелді.