Виктория Графеева әлем чемпионатының күміс жүлдегері атанды

АСТАНА. KAZINFORM - Қазақстандық Виктория Графеева (60 келі) Сербияның Ниш қаласында өтіп жатқан әйелдер арасындағы әлем чемпионаты күміс жүлдегері болды.

Финалда Виктория ресейлік Нуне Асатрянмен қолғап түйістірді.

Жекпе-жек барысында ол қарсыласына есе жіберіп, күміс жүлдені қанағат тұтты.

Енді ел құрамасынан Аида Әбікеева (63 келі) таиландтық Тананья Сомнуекпен, Елдана Тәліпова (81 келіден жоғары) қытайлық Илян Чжанмен шаршы алаңға шығады.

Еске салсақ, бұдан бұрын ел құрамасынан 50 келіге дейінгі салмақта қытайлық Ху Мэйиді 5:0 есебімен жеңіп, тұңғыш рет әлем чемпионы атанды. Ол 2022 жылы күміс, 2023 жылы қола жүлде алған еді.

Ал Назым Қызайбай (48 келі) ресейлік Юлия Чумгалакованы 5:0 есебімен тізе бүктіріп, үшінші мәрте әлем чемпионы атағын жеңіп алды. Қазірге дейін Назым 2014, 2016 жылдары топ жарған еді.

Әлем чемпионатына ел құрамасында 12 боксшы аттанған еді. Олардың арасынан жарыстың түрлі сатысында Анита Адишева (52 келі), Жайна Шекербекова (54 келі), Карина Ибрагимова (57 келі), Жасмин Қизатова (66 келі), Наталья Богданова (70 келі), Надежда Рябец (75 келі), Гүлсая Ержан (81 келі) қарсыластарына есе жіберіп қойды.