Волейбол: «Атырау» Талдықорғанда «Жетісу» командасын тізе бүктірді

АСТАНА. KAZINFORM – Талдықорған қаласында волейболдан ерлердің ұлттық лига командалары арасында өтіп жатқан Қазақстан чемпионатының үшінші турында «Жетісу» мен «Атыраудың» кездесуі тартысты өтті.

Өткен ойында «Буревестникке» жол берген талдықорғандықтарға үздік үштіктен шығып қалмас үшін тек жеңіс керек еді. 

Алаң иелері бірінші партияны өз есебіне жазды – 26:24. Бірақ екінші, үшінші сет «Атыраудың» еншісінде кетті – 25:18, 33:31. Содан кейін де қарқынынан танған жоқ – 25:21. Қорытынды есеп – 3:1, «Атыраудың» пайдасында.

Осылайша, өз алаңында қатарынан екінші рет жеңіліп қалған «Жетісу» турнир кестесінде 28 ұпаймен төртінші орынға сырғыды. 

Оралдың «Жайығы» солтүстікқазақстандық «Есілмен» ойында қинала қойған жоқ – 3:0 (25:15, 25:18, 25:16).

Ұпай санын 43-ке жеткізген Виктор Козиктің шәкірттері Қазақстан біріншілігінде бұрынғыша көш бастап келеді.

Екінші орындағы «Ақтөбе» көш соңындағы «Ұшқын-Көкшетаудан» 3:0 (25:13, 25:18, 25:19) есебімен басым түсті.

Жексенбі күні «Жайық» - «Ұшқын-Көкшетау», «Тараз» - «Буревестник», «Павлодар» - «Атырау», «Жетісу» - «Есіл» өзара сынға түседі. 

Еске сала кетейік, бұдан бұрын «Буревестниктің» қатарынан үшінші кездесуінде жеңіске жеткенін жазған болатынбыз.