Волейбол: «Берел» ел чемпионы «Тұран» командасын ұтты

ПЕТРОПАВЛ. KAZINFORM — Петропавлда волейболдан әйелдердің ұлттық лига командалары арасында Қазақстан чемпионатында орталық матчта «Берел» (Өскемен) мен «Тұран» (Түркістан) алаңға шықты.

Ришат Гилязутдинов жаттықтыратын өскемендіктер осы маусымда көш бастаушылардың қатарынан табылса, түркістандықтар өткен жылы ел чемпионы атанған еді.

Бұл жолы «Берел» қарсыласын 3:1 (25:17, 25:12, 19:25, 25:21) тізе бүктірді. Сөйтіп өскемендіктер бұрынғыша «Жетісу» (Талдықорған) командасымен құйрық тістесіп келеді.

Солтүстікқазақстандық «Қуаныш» өз алаңында «Ақтөбені» 3:0 (25:20, 25:11, 25:16) есебімен онша қиналмай ұтып, турнир кестесінде 34 ұпаймен үшінші орынға көтерілді. 

Павлодардың «Ертісі» тартысты бәсекеде «Ару-Астана» командасын 3:2 (18:25, 25:20, 28:30, 25:23, 15:10) қапы қалдырып, осы чемпионаттағы алғашқы екі ұпайына қол жеткізді. 

Дүйсенбі күні «Ару-Астана» — «Грация KZ», «Алматы» — «Жетісу», «Тұран» — «Ертіс», «Ақтөбе» — «Берел», «Қуаныш» — «Қарағанды» командалары кездеседі.

Еске сала кетейік, бұдан бұрын Петропавлда волейболдан әйелдер арасында ұлттық лига командалары сынға түсетінін жазған болатынбыз.

Сондай-ақ Оралда волейболдан қыздар арасында Қазақстан қысқы чемпионаты аяқталды.

«Жетісу» волейбол клубы Петропавлдағы турды жеңіспен бастады.