Волейбол: Чемпиондық бәсекеде «Берел» өз алаңында «Жетісудан» есе қайтарды

АСТАНА. KAZINFORM – Өскемен қаласында волейболдан әйелдердің ұлттық лига командалары арасында Қазақстан чемпионатының финалында «Берел» мен «Жетісу» екінші кездесуін өткізді.

Бірінші ойында сербиялық Марко Гршич жаттықтыратын талдықорғандықтар 3:1 есебімен жеңіске жеткен еді. Олар бүгін ұтқан жағдайда чемпион атанатын еді.

Алаң иелері сапында алғашқы финалдық бәсекеге қатыспаған негізгі байланыстырушы, канадалық Ким Робитай қайта шықты.

Бірінші партияда Ришат Гилязутдиновтің шәкірттері 25:20 есебімен басым түсті. Екіншісінде «Жетісу» дәл сондай есеппен қарымта қайырды – 25:20. Дегенмен бұдан кейін өскемендіктер күш алып кетті – 25:21, 25:22. Қорытынды есеп – 3:1.

Волейболдан әйелдер командалары арасында Қазақстан чемпионы ертең өтетін қосымша матчта анықталады. 

Еске сала кетейік, бұдан бұрын «Қуаныш» клубының екінші жыл қатарынан қола жүлдегер атанғанын жазған болатынбыз.