ВОЛЕЙБОЛ: Ерлер командалары арасындағы ел чемпионатында «Тараз» көш бастап келеді

АСТАНА. ҚазАқпарат - Өскемен қаласында ерлердің ұлттық лига командалары арасында ел чемпионатының бірінші үлкен турын «Тараз» командасы жеңіліссіз тәмамдады.

Қазақстан волейбол федерациясының сайтынан алынған мәліметке қарағанда, алғашқы кіші турды сәтті өткізген тараздықтар Өскемен қаласында да жеңіліс тапқан жоқ. Олар «Есілді» (Петропавл) 3:0, Оралдың «Конденсат-Жайықмұнайын» 3:1, «Атырауды» 3:0 есебімен тізе бүктірді.

«Жайық» волейбол клубының директоры Шоқан Кеңесовтің хабарлағанындай, 12 желтоқсан күні «Тараз» «ТНК «Қазхром» командасын 3:1 есебімен ұтты. Сөйтіп жекедара көш бастаған ол ұпай санын 19-ға жеткізді. Айта кету керек, Өскеменнің «ШығысҚорғасынҚұрылысы» да өз алаңында сәтті өнер көрсетті.

2014 жылғы ел чемпионы «Алматы» командасының жаңа маусымдағы аяқ алысы онша емес. Бұл турда олар оралдықтар мен «Есілді» 3:1 есебімен жеңгенімен, хромтаулықтар мен атыраулықтардан ұтылып қалды. Сол секілді күміс жүлдегер «Конденсат-Жайықмұнай» Өскеменде небәрі төрт ұпайға қол жеткізді. Олар «Алматы» мен «Таразға» қоса, өскемендіктерге 2:3 есебімен есе жіберіп, тек соңғы күні «Павлодарды» ғана 3:0 есебімен ұта алды.

Игорь Никольченко жаттықтыратын батысқазақстандықтар енді 23-28 желтоқсанда Хромтауда өтетін кіші турға қатысады.