Волейболдан ел чемпионаты: «Атырау» жартылай финалға жолдама алды

ОРАЛ. KAZINFORM — Орал қаласында «Жайық арена» спорт кешенінде өтіп жатқан волейболдан ерлердің ұлттық лига командалары арасында Қазақстан чемпионатының плей-офф бәсекесінде «Атырау» мен «Буревестник» командалары сынға түсті.

Б тобында Ислам Жұмабеков жаттықтыратын атыраулықтар кеше «Есілді» (СҚО) 3:0 есебімен тізе бүктірген еді.

«Атырау» бүгінгі ойында да Игорь Никольченконың шәкірттеріне еш мүмкіндік қалдырмады – 3:0 (25:20, 25:21, 25:19).

Осылайша, атыраулықтар тұрақты чемпионатта бірінші орынға ие болған «Жайық» командасымен финал жолдамасын сарапқа салады. 

Өткен жылы «Атырау» төртінші орынды қанағат тұтқан еді.

Еске сала кетейік, бұдан бұрын волейболдан Қазақстан чемпионатында «Атырау» командасының «Есілден» айласын асырғанын жазған болатынбыз.