Волейболдан ел чемпионаты: «Павлодар» клубы плей-офф кезеңін жеңіспен бастады

ОРАЛ. KAZINFORM — Орал қаласында волейболдан ерлердің ұлттық лига командалары арасында Қазақстан чемпионатының плей-офф кезеңі басталды.

Волейбол
Фото: Рустэм Ануарбеков

Алғашқы болып «Павлодар» мен «Тараз» клубтары алаңға шықты.

Өткен жылы павлодарлықтар өз алаңында финалда фаворит саналса да, Юрий Башкатов шәкірттеріне есе жіберіп, күмісті қанағат тұтқан еді.

Дегенмен осы чемпионат барысында Сергей Грибов жаттықтыратын павлодарлықтар «Таразды» үш рет жеңген еді.

Бұл жолы бірінші партия тараздықтардың есебіне жазылды — 25:23. Осыдан кейін «Павлодар» камбэк жасай білді — 25:20, 25:16, 25:21. Қорытынды есеп — 3:1.

Осылайша, «Павлодар» жартылай финалға бір қадам жақындады.

Еске сала кетейік, бұдан бұрын волейболдан Қазақстан чемпионатында Оралда плей-офф бәсекелері басталатынын жазған болатынбыз.

Соңғы жаңалықтар