Волейболдан ел чемпионаты: «Жетісу» «Павлодардан» басым түсті

АТЫРАУ. KAZINFORM — Атырау қаласында волейболдан ерлердің ұлттық лига командалары арасында ХХХІІІ Қазақстан чемпионатының бірінші турында орталық кездесулердің бірі «Жетісу» (Талдықорған) мен «Павлодар» арасында өтті.

Сергей Грибов жаттықтыратын павлодарлықтар өткен чемпионатты күміс жүлдемен аяқтаса, талдықорғандықтар бірінші турда жеңілмей келе жатқан еді.

Бірінші партияда Марат Адрышевтің шәкірттері 25:19 есебімен басым түссе, екіншісінде павлодарлықтар есе қайырды – 25:17. 

Үшінші сет талдықорғандықтардың пайдасына шешілді – 25:18. Олар төртінші партияны да аса қарқынды бастады – 7:0. Павлодарлықтар таразы басын теңестіргенімен, одан әріге шамалары жетпеді – 23:25. Қорытынды есеп – 3:1.

Осылайша, бірде-бір матчында жеңілмеген «Жетісу» 14 ұпаймен жекедара топ бастады. Талдықорғандықтар ертеңгі соңғы ойынның нәтижесіне қарамастан, бірінші турда озық шықты. 
Біріншілік аутсайдерлері – «Атырау» мен «Ұшқын-Көкшетау» ойынында алаң иелері 3:1 (25:23, 20:25, 25:19, 26:24) есебімен ұтып, бастапқы жеңісіне қол жеткізді.

Алғашқы турдың соңғы күні «Тараз» - «Жетісу», «Есіл» - «Ұшқын-Көкшетау», «Буревестник» - «Жайық», «Атырау» - «Ақтөбе» командалары өзара шеберлік байқасады. 

Еске сала кетейік, бұдан бұрын «Жайықтың» ел чемпионы «Таразды»» тізе бүктіргенін жазған болатынбыз.