Волейболдан ел чемпионатында «Берел» жартылай финалда «Жетісу» командасын ұтты

ТҮРКІСТАН. KAZINFORM — Түркістан қаласында волейболдан әйелдердің Ұлттық лига командалары арасында ХХХІІ Қазақстан чемпионатының шешуші ойындары өтуде.

Бірінші жартылай финалдық матчта «Берел» (ШҚО) мен «Жетісу» (Талдықорған) командалары өзара кездесті.

Ришат Гилязутдинов жаттықтыратын өскемендіктер сербиялық Марко Гршичтің шәкірттерін 3:0 (25:14, 25:21, 25:20) есебімен ұтты.

Тағы бір жартылай финалда «Қуаныш» (СҚО) пен «Тұран» (Түркістан) клубтары шеберлік байқасады.

Екі кездесуде жеңіске жеткен команда финалға жолдама алады. Ал есеп 1:1 болса, 16 наурыз күні тағы бір матч ойналады.

Қалған клубтар 5-8 орындар үшін таласады.

Еске сала кетейік, бұдан бұрын волейболдан әйелдер командалары арасында плей-офф бәсекелері басталғанын жазған болатынбыз.