Волейболдан Қазақстан чемпионаты: «Жетісу» финалға жолдама алды

АСТАНА. KAZINFORM – Өскеменде волейболдан әйелдердің ұлттық лига командалары арасында Қазақстан чемпионатының кезекті ойыны өтті. Талдықорғандық «Жетісу» командасы финалға жолдама алды. 

Сербиялық маман Марко Гршичтің волейболшылары осыған дейін екі жыл қатарынан финалға шыға алмаған еді. Олар бұл жолы соның есесін қайтарды. 

«Жетісудың» жартылай финалдағы қарсыласы Түркістанның «Тұраны» (бас бапкері Асқар Шалқыбеков) өткен жылы өз тарихында алғаш рет ел чемпионы атанған болатын. 

Тартысқа толы ойынның бірінші партиясында талдықорғандықтар айқын басымдылық танытты – 25:16. Екінші кезеңде түркістандықтар 22:18 есебімен алға шыққанымен, сол қарқынынан айырылып қалды – 23:25. Шешуші партияда «Жетісу» ойынның нүктесін қойды – 25:22. Қорытынды есеп – 3:0. 

Осы маусымда Қазақстан кубогына қоса суперкубокты жеңіп алған талдықорғандықтар ел чемпиондығынан басты үміткер екенін тағы бір дәлелдеді. Олардың қарсыластары «Берел» (Өскемен) – «Қуаныш» (СҚО) бәсекесінде анықталады. 

«Тұран» биыл тек қола жүлде үшін ғана таласады. 

«Алматыны» 3:0 (25:19, 25:22, 25:21) есебімен жеңген «Қарағанды» клубы 5-орын үшін алаңға шығады. 

Еске сала кетейік, бұдан бұрын волейболдан Қазақстан чемпионатында «Жетісудың» жартылай финалда «Тұранды» тізе бүктіргенін жазған болатынбыз. 

Сондай-ақ өскемендіктер «Қуанышты» қапы қалдырды.