Волейболдан Қазақстан чемпионатында «Ақтөбе» клубы финалға шықты

ОРАЛ. KAZINFORM — Орал қаласындағы «Жайық арена» спорт кешенінде волейболдан ерлердің ұлттық лига командалары арасында «Ақтөбе» мен «Жетісу» екінші жартылай финалдық кездесуін өткізді. 

Осы маусымда Қазақстан кубогы мен суперкубокты ұтып алған ақтөбеліктер (бас бапкері Сергей Трикоз) кеше талдықорғандықтарды 3:0 есебімен жеңген еді.

Бүгін «Жетісу» матчты қарқынды бастады — 25:21. Дегенмен бұдан кейін «Ақтөбе» камбэк жасай білді — 27:25, 25:15, 25:20. Қорытынды есеп — 3:1.

Бүгін сондай-ақ павлодарлықтар «Есіл» клубын 3:1 (25:17, 22:25, 25:18, 25:19) есебімен екінші рет тізе бүктірді. 

Ал, Алматының «Буревестнигі» өткен жылғы ел чемпионы «Таразды» тағы жеңді. Бұл жолы 3:1 (25:16, 27:25, 17:25, 25:19) есебі тіркелді.

Осылайша, «Павлодар» мен «Буревестник» 5-орын үшін таласатын болды.

Еске сала кетейік, бұдан бұрын волейболдан ел чемпионатында «Ақтөбе» командасының жартылай финалда «Жетісуды» жеңгенін жазған болатынбыз.

Сондай-ақ «Жайық» командасы камбэкпен «Атыраудан» басым түсті.