Volkswagen Қытайдағы зауытын жабады
АСТАНА. KAZINFORM — Немістің Volkswagen автоконцерні Қытайдың Нанкин қаласындағы зауытында өндірісті тоқтатып, оны биыл ресми түрде жабуды жоспарлап отыр, деп хабарлайды Kazinform агенттігінің меншікті тілшісі.
Бұл — Volkswagen мен Қытайдың SAIC автокомпаниясының бірлескен жобасы. Зауыт 2008 жылы ашылған, ал оның жылдық өндірістік қуаты 360 мың көлікке дейін жеткен. Соңғы уақытта бұл зауыт тек Passat және Skoda Superb модельдерін шығарып, қуаттылығын төмендетіп жұмыс істеп келген.
Зауытты жабудың ресми себебі — логистикалық қиындықтар. Өндіріс орны қаланың орталығына жақын орналасқан өнеркәсіптік аймақта болғандықтан, оны қайта жаңғырту тым қымбатқа түседі.
Енді зауыттың аумағы қалалық әкімдік меншігіне қайтарылады, ал өндіріс көршілес орналасқан Ичжэнь қаласындағы зауытқа көшіріледі. Айта кетейік, автоконцерн осындай қадамды 2022 жылы Шанхай маңындағы зауытында да жасаған болатын, бірақ ол кезде өндіріс толығымен тоқтатылған жоқ.
Осылайша, Қытайдағы жаһандық автотөңірегіндегі компаниялар түрлі қиындықтарға тап болып отыр. Бұл ретте Қытай Volkswagen үшін маңызды нарықтардың бірі саналады, себебі компанияның әлемдік жеткізілімдерінің шамамен 30%-ы осы елге тиесілі.
Volkswagen өкілі (Reuters агенттігі арқылы) «Нанкиндегі SVW зауыты өндірісті тоқтатты» және ол биылғы жылдың екінші жартысында жабылады деп растады.
Өкілдің айтуынша, SAIC VOLKSWAGEN-нің көптеген өндірістік алаң қазіргі уақытта электр көліктерін шығару үшін қайта жабдықталуда немесе қайта жабдықталып қойған.
2025 жылдың бірінші жартысында SAIC Volkswagen 523 мың автокөлік сатқан, бұл өткен жылмен салыстырғанда 2,3%-ға артық. Қазір компания жаңа электр көліктерін, оның ішінде ID.4X Smart Edition, 2025 ID.3 Smart Edition және ID.3 GTX үлгілерін шығарып жатыр.
Жыл соңына қарай SAIC VW жаңа жетілдірілген цифрлық платформа негізіндегі алғашқы электр көлігі — Audi E5 Sportback моделін таныстырмақ. Бұл көлік толық қуатпен 770 шақырымға дейін жүре алады.
Электромобильдерге көшу үрдісіне қарамастан, бренд «жанармай мен электр энергиясын қатар дамыту» саясатын жалғастыратынын мәлімдеді. Компания Passat, Lavida, Tiguan және T-Roc секілді бензинмен жүретін көліктерді шығаруды тоқтатпайды.
Volkswagen компаниясы 2026 жылды «жаңа энергетикалық көліктер (NEV) мен интеллектуалды көлік құралдарын» шығаруға арналған ерекше жыл деп жариялады. 2030 жылға қарай SAIC Volkswagen 20-дан астам жаңа көлік түрін, соның ішінде жол талғамайтын электр көліктері (EV) мен қосарланған гибридтерді (PHEV) шығаруды жоспарлап отыр.
Айта кетелік жыл аяғына дейін Астанадағы көлік ағынын ЖИ арқылы реттейтін жүйе әзірленеді.
