Волонтер жылы: Қызылордада студент жастармен кездесу өтті
ҚЫЗЫЛОРДА. ҚазАқпарат - Қызылордада еріктілер жылына орай Ә.Тәжібаев атындағы облыстық әмбебап ғылыми кітапханасында студент жастармен кездесу өтті, деп хабарлайды ҚазАқпарат тілшісі.
Кездесу барысында жастар қазақтың ұлы ақыны Абайдың және ғұлама ойшыл Әбу Насыр әл-Фарабидің өмір тарихынан жан-жақты хабардар болып, шығармашылығымен танысты.
Сондай-ақ, шара барысында «Иманды жас – ел болашағы» тақырыбында сұхбат өрбіді. Онда Қазақстан Мұсылмандары діни басқармасының Қызылорда облысы бойынша өкілі, «Ақмешіт-Сырдария» мешітінің бас имамы Болатбек Әбуов жастарға«ата-ананы құрметтеудің мәртебесі, көркем мінезділік, имандылық, мейірімді болу тақырыптарында өнегелі әңгіме айтты.
Сондай-ақ Нұр-Мүбарак университетінің 4-курс студенті Абылай Кенжалыұлы білім алудың парыздылығы, уақытты тиімді пайдаланудың пайдасы жайлы сүбелі ойымен бөлісті.
Ал, қалалық «Жастар ресурстық орталығы» КММ-ның директоры Сабыржан Бауыржанұлы өңірдегі ерікті азаматтардың ерен еңбектерімен таныстыра отырып, еріктіліктің маңызы мен мақсаттарын түсіндірді.
Бұдан бұрын Қызылордада Абайға арналған кітап көрмесі ашылды.
