Wizz Air Таяу Шығыстағы тұрақсыздыққа байланысты Абу-Дабиден кетеді

АСТАНА. KAZINFORM — Wizz Air Таяу Шығыстағы тұрақсыздықтан кірісінің төмендеуіне байланысты Абу-Дабидегі филиалын жауып, Шығыс Еуропаға ауыспақшы, деп хабарлайды Reuters.

Wizz Air — шығыс еуропалық саяхатшылар үшін Мажарстанда құрылған қолжетімді тасымалдаушы. Компания алдымен Батыс Еуропада кең таралды, алты жыл бұрын Таяу Шығыста кеңею мақсатымен Абу-Дабиде база ашты.

Бірақ дүйсенбіде компания геосаяси тұрақсыздыққа, әуе кеңістігінің жиі жабылуына және әуе қозғалысына деген сұранысқа нұқсан келтіріп, мүмкіндік бермейтін үзілістерді алға тартып, бұл жоспардан бас тартқанын мәлімдеді.

Йожеф Варадидің айтуынша, Wizz Air-дің Орталық және Шығыс Еуропадағы негізгі нарығына қайта оралуы Ryanair-пен бәсекелестікте компанияның қаржылық тиімділігін жақсартпақ.

— Соңғы жылдары біз бұл нарыққа аз инвестиция салдық. Енді біз оның әлеуетін толығымен пайдалана аламыз, — деді ол Reuters агенттігіне.

Лондон қор биржасында тіркелген компанияның акциялары таңертеңгі сауда-саттықта 2,6%-ға өсті. Алайда, соңғы екі жылда олар Pratt & Whitney GTF қозғалтқыштарындағы ақауларға байланысты шамамен 62%-ға төмендеді, бұл кейбір ұшақтың уақытша істен шығуына әкелді.

Алдағы бес жыл ішінде Wizz компаниясы Airbus-қа (AIR.PA) 280 ұшаққа тапсырыс берді. Варадидің айтуынша, олардың көпшілігі Орталық және Шығыс Еуропаға қызмет көрсетуге бағытталады, бұл компания бизнесінің шамамен үштен екісін құрайды.

Аймақтық дағдарысқа дейін де Варади Wizz компаниясының бизнес үлгісі Абу-Дабиде жақсы жұмыс істемегенін айтты. Себебі ыстық, құрғақ климатта қозғалтқыштар тез тозып, жұмыс тиімділігін төмендетеді.

Wizz сонымен қатар Абу-Даби базасын ашқан кезде уәде етілген Үндістан мен Пәкістан нарықтарына қол жеткізе алмады, бұл оның өсу әлеуетін шектеді.

Бұған дейін маусым айында Таяу Шығыстағы қақтығыс әуе қатынасына әсер етіп, рейстер тоқтатылып жатқанын жазған едік.