World Boxing: Қазақстандық үш боксшы финалға шықты

АСТАНА. KAZINFORM - Бразилияда өтіп жатқан World Boxing аясында әлем кубогының бірінші кезеңінде ел құрамасынан үш боксшы финалға шықты.

Жартылай финалда Нұрсұлтан Алтынбек (55 келі) үндістандық Маниш Ратуримен қолғап түйістірді. Жекпе-жек барысында қазақстандық былғары қолғап шебері сенімді ойын көрсетті. Нәтижесінде қарсыласын 5:0 есебімен тізе бүктірді.

Тағы бір жекпе-жекте Дәулет Төлемісов (85 келі) франциялық Абдулла Траоримен шеберлік байқасты. Кездесу барысында ол қарсыласынан жоғары деңгейдегі қимылымен көзге түсті. Екінші раундта қарсыласын нокаутқа жіберді. Жеңіс қазақстандық боксшыға бұйырды.

Финалға берілген тағы бір жолдамаға Жазира Орақбаева (51 келі) ие болды. Жартылай финалда ол Наталья Кузевсканы жеңді. Есеп - 3:2.

Ал Ұлжан Сәрсенбек (57 келі) польшалық Юлия Шеремета, Диас Молжігітов (75 келі) өзбекстандық Жавохир Умматалиевке есе жіберді.

Сондай-ақ 3 сәуірде Даниял Сапарбай (90 келіден жоғары) қола жүлдегер атанды. Ол жартылай финалда өзбекстандық Жахонгир Зокировқа 0:5 есебімен жол берді.

Қазірге дейін ел құрамасынан Нұрзат Оңғаров (50 келі), Талғат Сырымбетов (60 келі), Анита Әдішева (54 келі), Алмат Әбдуали (65 келі), Дархан Дүйсебай (70 келі) жарыс жолынан шығып қалды.

World Boxing турнирі үш кезеңнен тұрады. Екінші кезең 30 маусым - 7 шілде аралығында Қазақстанда болады. Ал үшінші кезең 21-27 шілде аралығында өтеді. Бірақ оның өтетін орны әзірге белгісіз.