World Boxing ресми түрде AIMS құрамына кірді
АСТАНА. KAZINFORM — Лозаннада Тәуелсіз танылған спорт түрлері альянсы (AIMS) кезектен тыс онлайн-ассамблея өткізді, деп хабарлайды Ұлттық олимпиада комитеті.
Сессияның басты оқиғасы — Халықаралық World Boxing федерациясының ұйым қатарына ресми түрде қабылдануы болды.
World Boxing-тің өтінімі SportAccord Атқарушы комитетінің жан-жақты тексерісінен өтіп, кейіннен Мүшелік комиссиясында қаралды. Комиссия федерацияның барлық қажетті талаптарға сәйкес келетінін растады.
SportAccord-тың оң қорытындысынан кейін, World Boxing-ті қабылдау туралы ұсынысты AIMS Кеңесі мен оның мүшелері мақұлдады. Осылайша World Boxing AIMS спорт қауымдастығының бір бөлігіне айналды. Бұл — Федерацияның дамуындағы маңызды кезең.
Айта кетейік, AIMS-ке мүшелік — Халықаралық Олимпиадалық комитетінің (ХОК) тарапынан танылуды мақсат еткен ұйымдар үшін міндетті қадам. AIMS-ке мүше болмайынша, ХОК өтінімдерді қарастырмайды.
Осыған дейін хабарланғандай, бүгін Алатау етегінде әлемнің ең әйгілі балуандарының басын қосқан PWL турнирінде еркін күрестен әлем чемпионатының 2 дүркін қола жүлдегері, 3 дүркін Азия чемпионы Азамат Дәулетбеков қарсыласынан басым түсті.
