WTA қорытынды турнирі: Елена Рыбакина Мария Саккариді ұтты

Қазақстанның бірінші, әлемнің 4-ракеткасы Елена Рыбакина Мексиканың Канкун қаласында өтіп жатқан WTA қорытынды турнирінде екінші матчын өткізді, деп хабарлайды Kazinform.

Қазақстандық теннисші әлемнің 9-ракеткасы, грекиялық Мария Саккаримен кортқа шықты.
Елена Рыбакина кездесуді тамаша бастап, небәрі 22 минутқа созылған бірінші партияда қарсыласына еш мүмкіндік қалдырған жоқ – 6:0.

Тартысты өрбіген екінші сетте тай-брейкте грекиялық спортшы сәтті ойнады – 7:6 (7:4).

Үшінші, шешуші партияда есеп 3:2 болған мезетте Елена брейк жасай білді – 4:2. Бірақ ізінше Марияның брейк жасауына мүмкіндік беріп қойды. Ақыры матч тағдыры тай-брейкте шешіліп, онда қазақстандық теннисші матчты эйспен түйіндеді – 7:6 (7:2).

Екі сағат 25 минутқа созылған бәсеке барысында Е.Рыбакина 6 эйспен бірге 9 брейк-пойнттың төртеуін пайдаланды. М.Саккари 4 эйс, 1 брейкпен көзге түсті (7 брейк-пойнт).

Бакалар тобында сынға түсіп жатқан Е.Рыбакина алғашқы бәсекесінде әлемнің 5-ракеткасы, америкалық Джессика Пегулаға есе жіберген еді. Д.Пегула содан кейін әлемнің 1-ракеткасы, Беларусь өкілі Арина Соболенконы 6:4, 6:3 есебімен тізе бүктірді. Осылайша, өз тобында көш бастаған америкалық спортшының есебінде 2 жеңіс бар.

Е.Рыбакина 3 қараша күні таңға қарай А.Соболенкомен шеберлік таластырады. Егер оны жеңген жағдайда жартылай финалға жолдама алады.

Еске сала кетейік, бұдан бұрын теннистен әлем чемпионатында Қазақстан жасөспірімдер құрамасының алғашқы жеңісіне қол жеткізгенін жазған едік.
Сондай-ақ Александр Бублик Париж мастерс турнирінің үшінші айналымына шықты.