Ядролық «үштік», жаңа буын танктері: Бейжіңдегі парадта не көрсетілді
АСТАНА. KAZINFORM – Қытай Екінші дүниежүзілік соғыстағы Жеңістің 80 жылдығына арналған ел тарихындағы ең ірі әскери шеруде стратегиялық маңызды қару-жарақтың соңғы үлгілерінің бірқатарын көрсетті. Шеруде алғаш рет елдің ядролық «үштігі» таныстырылды, деп хабарлайды Синьхуа ақпарат агенттігі.
Ядролық «үштік»
Қытай толыққанды ядролық «үштікті» қалыптастыра отырып, құрлық, теңіз және әуедегі стратегиялық күштерін алғаш рет таныстырды. Оның құрамына алыс қашықтыққа ұшатын JingLei-1 авиациялық зымыран, JuLang-3 сүңгуір қайықтағы құрлықаралық баллистикалық зымыран, DongFeng-61 құрлықаралық баллистикалық зымыран, сондай-ақ құрлықтағы құрлықаралық баллистикалық зымыранның жаңа түрі DongFeng-31 кірді.
Көрермендерге сонымен қатар ұшу аймағы бүкіл ғаламшарды қамтитын DongFeng-5C стратегиялық құрлықаралық зымырандары, сондай-ақ жоғары жылдамдығымен, қару-жарақтың ену қабілетімен және дәлдігімен ерекшеленетін DF-17 және DF-26D гипердыбыстық баллистикалық зымырандар таныстырылды.
Әрбір аббревиатураның өз мағынасы бар: YJ — Yingji («Бүркіт соққысы»), DF — Dongfeng («Шығыс желі»), теңізге негізделген ракеталар — JL — Julang («Алып толқын») және әуе негізіндегі ракеталар — Jinglei («Күн күркіреуі») дегенді білдіреді.
Таныстырылған жүйелердің ішінде JL-3, JL-1, DF-26D, DF-31BJ, DF-61 және DF-5C бұрын құпияланған болатын. Олардың бір уақытта көрсетілуі ядролық «үштік» қалыптастыру аяқталғанын көрсетеді. Бұл ҚХР арсеналындағы бұрынғы олқылықты толтырды, өйткені Қытай армиясында әуедегі ықпалды ядролық қаруы болған жоқ.
Жаңа буын танкілері
Жаңа броньды техника ішінде бесінші буынның «Tип-100» негізгі жауынгерлік танктері мен сол сериядағы атыс қолдау машиналары ерекше қызығушылық тудырды.
Жойғыштар және стратегиялық авиация
Парадта алғаш рет қытайлық бесінші буын жойғыштарының барлық түрлері – J-20, J-20A, J-20S, J-35A және J-35 бір мезгілде көрсетілді. Сондай-ақ стратегиялық бомбалаушы ұшақтар таныстырылды.
Ұшқышсыз ұшу аппараттары
Ұшқышсыз жүйелер саласында Қытай әскери-әуе күштері операцияларының жаңа түрлерін жүргізуге дайын екенін танытты. Барлау және соққыға арналған ұшқышсыз ұшу аппараттары, қанатты ұшқышсыз ұшу аппараттары, кемедегі ұшқышсыз тікұшақтар таныстырылды.
Киберсоғыс жабдығы
Сондай-ақ колоннада ұлттық киберқорғанысты нығайтуға пен барлық саладағы операцияларды өткізуді қамтамасыз ете алатын киберсоғыс жүйесінің төрт кешені көрсетілді.
Радиэлектрондық соғыс жүйелері
Парадқа әуе және ғарыш қорғанысын қамтамасыз етуге, жау желілерін істен шығаруға және олардың цифрлық тізбектерін жоюға қабілетті радиоэлектрондық қарсы тұру шаралардың бес түрі қатысты.
ҚХР Орталық әскери кеңесі Біріккен штабының жедел басқармасы бастығының орынбасары генерал-майор У Цзэкэ атап өткендей, парадта Қытай қарулы күштері құрылымының жаңа құрастырылуы ұсынылды, сондай-ақ құрлық, теңіз және әуедегі стратегиялық қару, гипердыбыстық және дәлдігі жоғары соққы қаруы, ұшқышсыз аппараттардың кейбір түрлері алғаш рет таныстырылды.
Бұған дейін Қасым-Жомарт Тоқаев әскери парадты тамашалағанын жазған болатынбыз.
