Йемен астанасы АҚШ-тың қарқынды соққысына ұшырады
АСТАНА. KAZINFORM — Трамптың әскери науқаны ауқымы мен қарқындылығы жағынан өзінен бұрынғы президенттің саясатынан асып түсті, деп хабарлайды Kazinform тілшісі.
Йемендік БАҚ АҚШ-тың бүкіл елге соның ішінде ел астанасы Сананың бір бөлігіне жасалған әуе шабуылдарының жаңа толқыны туралы хабарлады.
Al-Masirah ақпарат агенттігінің хабарлауынша, 28 наурыз, жұма күні таңнан бері кем дегенде 19 шабуыл жасалды.
Келтірілген шығын мен құрбан болғандар туралы әзірге нақты ақпарат жоқ. Бастапқы мәліметтерге қарағанда, жұма күні Санадағы соққылардан кемінде жеті адам жараланған.
Сондай-ақ, Сана әуежайына, Қызыл теңіз жағалауындағы Ходейда порт қаласы маңындағы аудандарға, топтың бекінісі Саада провинциясына және Йеменнің әл-Джауф, Амран және Мариб провинцияларына соққы берілді.
Сондай-ақ, хуситтердің әскери лагерлері мен басқа құрылымдар орналасқан Амрандағы таулы аймақтар да зардап шекті. Al-Masirah жаңалықтар желісі шабуылдардан кейін байланыс желілері үзілгенін хабарлады.
АҚШ соққыларын күшейтті
АҚШ-тың Йемендегі хусит көтерілісшілеріне қарсы жаңа әуе шабуылы науқаны бұрынғы президент Джо Байден кезінде жүргізілгеннен гөрі қарқынды және ауқымды болып көрінеді, өйткені АҚШ тек зымыран нысандарын нысанаға алудан жоғары профильді нысандарды нысанаға алуға және қалалық аймақтарға бомба тастауға көшті, деп хабарлайды Associated Press.
Агенттіктің хабарлауынша, хуситтер бақылауындағы аудандарда бейбіт тұрғындардың қаза болуы туралы алаңдаушылық артып келеді.
АҚШ әскері соққы бір аптадан астам уақыт бұрын басталғаннан бері бейбіт тұрғындардың құрбан болғанын мойындамағанымен, белсенділер соққылардан хуситтер бақылайтын аумақтағы бейбіт тұрғындар қаза болуы мүмкін деп қауіптенеді.
Хуситтер қазір әуе шабуылынан 57 адамның қаза тапқанын айтады.
Өткен аптада хуситтер Израильге қарсы операцияларын «Газа қоршауы жойылмайынша» жалғастыратындарын айтты, сонымен қатар АҚШ әскери кемелеріне шабуыл жасады.
Айта кетейік, биыл АҚШ-тың жаңа әкімшілігі йемендік хуситтерді «террорлық ұйым» деп тағы да мойындады.
Бұған дейін біз йемендік хуситтер кім екенін айтқан болатынбыз.
