Йеменде су тасқынынан жеті адам қаза тапты

АСТАНА. KAZINFORM — Йеменде нөсер жауын мен тасқыннан жеті адам қаза тапты, олардың бесеуі – балалар, деп хабарлайды Анадолы. 

Йеменде қатты нөсер жауын мен су тасқыны салдарынан төрт провинцияда қаза тапқандар саны жеті адамға жетті, олардың бесеуі – балалар.

Жергілікті биліктің деректеріне сәйкес, табиғи апаттан ең көп зардап шеккен өңірлер – Шабуа, Хадрамаут, Лахдж және Хадджа провинциялары.

Лахдж провинциясының Тубен ауданында тасқын бір адамның өмірін қиды. Тағы бес адамды судан құтқарды, олардың көліктері су астында қалған. Сондай-ақ бірнеше үйдің қирағаны хабарланды.

Йемен Ішкі істер министрлігінің мәліметінше, Шабуа мен Хадрамаут провинцияларында екі бала мен тағы бір адам су тасқыны кезінде мерт болған.

Бұған дейін хуситтердің бақылауындағы «26 September Net» сайты Хадджа провинциясында үш баланың қаза тапқанын және бір үйдің қиратылғанын хабарлаған болатын.

Елдің метеорологиялық және ерте ескерту орталығы алдағы сағаттарда да қатты жауын-шашынның жалғасатынын ескертті.

Айта кетелік Йемен жағалауында 76 мигрант қаза тапқан еді.