Юлия Путинцева Ролан Гаррос турнирінде АҚШ чемпионына жол берді

АСТАНА. ҚазАқпарат – Қазақстанның екінші, әлемнің 58-ракеткасы Юлия Путинцева Ролан Гаррос турнирінің төртінші айналымына шыға алмады, деп хабарлайды ҚазАқпарат тілшісі.

Юлия Путинцева Франция ашық чемпионатында екі рет 2016 және 2018 жылдары ширек финалға дейін жеткен еді.

Қазақстандық теннисші үшінші айналымда әлемнің 30-ракеткасы, 2017 жылғы US Open жарысының жеңімпазы, америкалық Слоан Стивенспен ойнады.

Осыған дейін қарсыластар өзара бес мәрте кездесіп, соның үшеуінде Ю.Путинцева жеңген еді.

Бұл жолы бірінші партияда америкалық спортшы 6:3 есебімен басым түсті.

Есесіне екінші сетте Юлия 5:2 есебімен алға кетіп, өз пайдасына аяқтай білді – 6:3.

Әйтсе де шешуші, үшінші партияда америкалық теннисші күш алып кетті – 6:2.

Екі сағат 20 минутқа созылған тартысты бәсеке барысында Ю.Путинцева 1 эйс жасап, 17 брейк-пойнттың бесеуін ғана пайдаланды.

Қарсыласы 7 брейкпен (10 брейк-пойнт) көзге түсті.

С.Стивенс ширек финалға шығу үшін әлемнің 2-ракеткасы, белоруссиялық Арина Соболенкомен таласады.

Ол дүниежүзілік рейтингте 82-орында тұрған ресейлік Камилла Рахимованы оңай тізе бүктірді – 6:2, 6:2.

Еске сала кетейік, бұдан бұрын Елена Рыбакинаның Ролан Гаррос турнирінің үшінші айналымына шыққанын жазған болатынбыз.

Сондай-ақ Анна Данилина жұптық сында Ролан Гаррос турнирін жеңіспен бастады, ал Александр Недовесов үшінші айналымға жолдама алды.

Қазақстандық теннисшілер АҚШ-тағы жарыстың ширек финалында кездеседі.

Ролан Гарроста Қазақстан теннисші қыздары үздік үштікке енді.